Сувайш каналида 1 июль куни нефть кемаси чўкиб кетди. Экипажнинг камида 4 аъзоси ҳалок бўлиб, яна 4 нафари бедарак йўқолди. Бу ҳақда Al Jazeera хабар берди.
Миср ҳукуматига кўра, Adam Marine 12 кемаси Сувайш каналидаги “Гебел ал-Зеит” нефть қазиб олиш ҳудудида чўкиб кетганини маълум қилган. Ҳодиса оқибатида 22 киши жароҳатланган. Жабрланганларнинг 4 нафари самолётда шифохонага етказилган, яна 18 нафари тез ёрдам машинасида олиб кетилган.
Нефть вазирлиги вазиятни яқиндан баҳолаётгани ҳамда ҳудуддаги тегишли органлар ва компаниялар билан бирга ишлаётганини таъкидлаган. Ҳодиса сабаблари ўрганилмоқда. Меҳнат вазири Муҳаммад Жибран ва Қизил денгиз губернатори Амр Ҳанафий 2 июль куни “Ал-Гуна” касалхонасига омон қолганлар ҳолидан хабар олиш учун борган. Ҳанафийнинг айтишича, Миср денгиз флотининг кемалари бедарак йўқолган экипаж аъзоларини қидириш ва қутқариш ишларига қўшилган.
“Гебел ал-Зеит” Мисрнинг йирик нефть қазиб олиш нуқтаси бўлиб, Сувайш каналидан тахминан 300 километр жанубда жойлашган.
Изоҳ (0)