Миср Сувайш каналидан 10 йил фойдаланиш давомида 47 миллиард доллар даромад олди

Миср ўтган ўн йил давомида Сувайш каналидан фойдаланиш орқали қарийб 47 миллиард доллар ишлаб топди. Бу ҳақда, Миср давлат статистика агентлигига асосланиб, «ТАСС» хабар бермоқда.

Агентлик маълумотларига кўра, 2004—2014 йиллар оралиғида Сувайш каналидан фойдаланиш натижасида Миср ғазнасига қарийб 47 миллиард доллар, йилига ўртача 4,7 миллиард доллардан даромад тушган. Энг кўп даромад 2009/2010 йилги мавсумда — 5,5 миллиард доллар, энг кам даромад эса 2004/2005 йилги мавсумда — 3,3 миллиард доллар — олинган.

Мазкур ўн йиллик давомида Сувайш каналини 182,2 мингта турли кема кечиб, умумий ҳисобда 8,3 миллиард тонна юкни олиб ўтган.

Маълумот учун, 6 август куни Мисрда 72 километрли янги Сувайш каналининг очилиши бўлиб ўтади. Қурилиши июль ойида якунига етган объект учун Миср ҳукумати 8 миллиард доллар сарфлади. Ҳисоб-китобларга кўра, 2023 йилга бориб Сувайш каналидан йилига 15 миллиард доллар миқдорида даромад олинади.