Ўзбекистонда июлнинг жазирама иссиқ кузатилган кунларида республика бўйича тез тиббий ёрдам хизматига жами 247 минг 459 та чақириқ келиб тушди. Бу ҳақда 7 июль куни Соғлиқни сақлаш вазирлиги матбуот хизмати хабар берди.
Гидрометеорология хизмати маълумотларига кўра, 2—5 июль кунлари Ўзбекистон ҳудудига жанубдан жуда иссиқ об-ҳаво оқимлари кириб келиши натижасида шу кунлари мамлакатда жазирама иссиқ кузатилганди. Айрим жойларда ҳарорат 46 даражагача кўтарилди.
Республика тез тиббий ёрдам маркази директори Абдувоитжон Гафуровнинг таъкидлашича, жазирама об-ҳаво шароитида, энг аввало, сурункали касаллиги бўлган, диспансер назоратида турувчи беморлар, ёш болалар, ҳомиладор аёллар ва кексалар саломатлигига алоҳида эътибор талаб этилади. Шу боис улар соғлиғини тиббий назоратга олиш, зарурат бўлганда шошилинч тиббий ёрдам кўрсатиш лозим.
“Рақамларга тўхталсак, ўтган ҳафтада, яъни аномал иссиқ кузатилган даврда республика бўйича тез тиббий ёрдам хизматига жами 247 минг 459 та чақириқ келиб тушди. Уларнинг 172 минг 676 тасини шошилинч кўрсатма, 65 минг 163 тасини эса сурункали касалликлар билан боғлиқ мурожаатлар ташкил этди”, дейди мутахассис.
Унинг қайд этишича, тегишли масъул ташкилотлар томонидан оммавий ахборот воситалари ва ижтимоий тармоқлар орқали фуқароларга аномал иссиқ ҳаво шароитида эҳтиёт чораларини кўриш тўғрисида берилган тавсиялар туфайли чақириқлар сони ундан олдинги ҳафтага (24—29 июнь) нисбатан 1,2 фоизга камайди.
Шу ўринда вазирлик зарурат бўлмаса, аҳолидан жазирама пайти ташқарига чиқмасликни, тез-тез суюқлик ичиш, имкон қадар ёғли, дудланган таомлар тановул қилмаслик, аксинча кўпроқ мева ва сабзавотлар истеъмол қилишни тавсия этди.
Изоҳ (0)