Фарғона вилоятида бугунги кунда чиқиндиларни ташиш хизмати бўйича аҳолидан жами 2 миллиард сўмдан ортиқ ҳақ ундирилгани аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Маълум қилинишича, 2025 йилда Рақобат қўмитаси ва унинг ҳудудий бошқармаларига чиқинди ташиш хизмати бўйича фуқаролардан кўплаб норозилик мурожаатлари келиб тушган. Хусусан, Фарғона вилоятининг Қува туманидан тушган ўндан ортиқ мурожаатлар таҳлил қилинганда хонадондан чиқинди ташиб кетилмаётгани, аҳолининг аниқ сонига мос равишда тўлов белгиланмаслиги ва хизматларнинг белгиланган графикда кўрсатилмаслиги ҳолатлари аниқланган. Жумладан, 2 нафар фуқаро истиқомат қилаётган хонадондан чиқинди ташиб кетилмаган ва бундан ташқари ҳисоб-китобда 5 киши учун ҳақ ундирилган.
Вазирлар Маҳкамасининг 2019 йил 6 февралдаги 95-сонли қарори билан тасдиқланган қоидага асосан хизмат кўрсатувчи ташкилот маиший чиқиндиларни тўплаш ва олиб чиқиб кетиш бўйича хизматлар кўрсатишнинг тартиби ва тарифларининг ўзгаргани тўғрисида ушбу тарифлар кучга киришидан 15 кун аввал хизмат кўрсатувчи ташкилотнинг стендида, эълонлар тахтасида эълонлар осиш йўли билан, шунингдек, оммавий ахборот воситалари орқали истеъмолчини хабардор қилишга мажбурлиги белгиланган.
Бироқ “Тозалик Санитар Сервис” МЧЖ томонидан янги тарифлар аҳолига ўз вақтида эълон қилинмаган ҳолда қўллангани туфайли 2024–2025 йиллар мобайнида Қува туман филиали томонидан юқори тариф қўлланиши натижасида 264 миллион сўмдан ортиқ, Фарғона шаҳар филиали томонидан 17 миллион сўмга яқин маблағлар ортиқча ҳисобланган.
Шунингдек, Қува туманидаги “Байналмилал”, “Жалаер”, “Ифтихор”, “Катта Қашқар”, “Мустақиллик”, “Намуна”, “Суфи” МФЙга Вазирлар Маҳкамасининг қарори талаблари асосида хизмат кўрсатилмагани натижасида 1,7 миллиард сўмдан зиёд ортиқча маблағ ҳисобланган.
Юқоридагилардан келиб чиқиб, Фарғона вилоятида бугунги кунда чиқиндиларни ташиш хизматидан аҳолидан жами 2 миллиард сўмдан ортиқ ҳақ ундирилгани аломатлари мавжудлиги аниқланиб, асоссиз ундирилган маблағни истеъмолчиларга қайтариш бўйича кўрсатма берилган.
Бошқа вилоятларда ҳам илгари шу каби ҳолатлар қайд этилганди. Наманган вилоятида чиқинди ташиш хизмати учун аҳолидан 18 миллиард сўмдан ортиқ пул асоссиз олингани аниқланганди. Сурхондарёда бу хизмат учун аҳолидан ортиқча 3,2 миллиард сўм тўлов олинганди.
Изоҳ (0)