Республика бўйича 200 дан ортиқ дорихоналар 2,6 миллиард сўмдан ортиқ асоссиз даромад олгани аниқланиб, уларни қайтариш бўйича тегишли чоралар кўрилди, деб хабар бермоқда Рақобат қўмитаси матбуот хизмати.
Қўмита томонидан Fair tech ягона ахборот тизими орқали дорихоналарда дори воситаларини сотишда белгиланган савдо устамаларига риоя этилмагани ҳолатлари ўрганиб борилган. Ягона ахборот тизими орқали келиб тушган хабарлар бўйича 2025 йилнинг ўтган даври давомида олиб борилган ўрганишларда 225 та дорихонада 62 704 та ҳолатда дори воситаларнинг савдоси бўйича 2,6 миллиард сўм асоссиз даромад олингани аниқланди ҳамда белгиланган тартибда иш қўзғатилиб, маблағларни қайтариш бўйича тегишли чоралар кўрилди.
Жумладан, улгуржи савдода:
- 1744 та ҳолатда — “Евро Фарм Бизнес” МЧЖ ХК;
- 1695 та ҳолатда — Тар Pharm Alliance МЧЖ;
- 5191 та ҳолатда — “Гармония Фарм” МЧЖ.
Нархларни асоссиз ошириш аломатлари бўйича юқоридаги МЧЖларга нисбатан қўмитанинг махсус комиссияси томонидан иш қўзғатилди.
Рақобат қўмитаси дорихоналарда ресепт билан бериладиган дори воситалари белгиланган нархларига риоя этилмай сотилган тақдирда чора кўрилиши ҳақида огоҳлантирди.
2025 йилнинг бошларида фармацевтика фаолияти билан шуғулланувчи тадбиркорлик субъектлари томонидан референт нархларнинг оширилиши юзасидан ўтказилган мониторингда 1300 га яқин дорихоналарда қонунбузилиш ҳолатлари аниқланганди. 2024 йилнинг 7 ойида дори воситаларини нархларини асоссиз ошириш натижасида истеъмолчилардан 5,4 миллиард сўмга яқин маблағ, яъни асоссиз даромад олингани аниқланган. Ноқонуний олинган маблағлар истеъмолчилар фойдасига қайта ҳисоб-китоб қилиниб, уларнинг ҳуқуқларини тиклаш чоралари кўрилган.
Дорихоналарда сотилган дори воситалари ва тиббий буюмлар учун белгиланган устамалардан юқори маблағ олингани аниқланса, ортиқча пулни истеъмолчига қайтариш тизими 2023 йил 1 майдан ишга туширилганди. Ушбу тартибга кўра, истеъмолчилар томонидан дорихоналарда харид қилинган дори воситалари ва тиббий буюм харид чекларининг QR-коди “Солиқ” мобил иловасида рўйхатдан ўтказилганда белгиланган устамалардан юқори маблағ олингани аниқланса, автоматик равишда Рақобат қўмитасига хабар юборилиб, ортиқча олинган маблағни истеъмолчига қайтариш тизими ишга туширилмоқда.
Изоҳ (0)