Сирдарё вилояти “Тоза ҳудуд” давлат унитар корхонаси кўрсатилмаган хизмат учун аҳолига 528,6 миллион сўм ортиқча тўлов ҳисоблагани аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қўмитанинг Сирдарё вилояти ҳудудий бошқармаси томонидан Сирдарё вилояти “Тоза ҳудуд” давлат унитар корхонасининг 2023 ва 2024 йилнинг 1-ярим йиллигида маиший чиқинди ташиш хизматларини кўрсатиш соҳасида қонунчилик талабларига риоя этилиши юзасидан ўрганиш ва таҳлил ишлари олиб борилганда унинг туман-шаҳар филиаллари томонидан маиший чиқинди ташиш хизматининг МФЙ кесимида белгиланган жадвал асосида хизмат кўрсатмаётгани, бунинг натижасида аҳолидан ортиқча маблағлар олинганлик ҳолатлари аниқланган.
Жумладан, “Тоза ҳудуд” ДУК Гулистон туман филиали томонидан тумандаги 3 та МФЙда 9 158 нафар аҳолидан кўрсатилмаган хизмат учун жами 46,1 миллион сўм ортиқча тўловлар ҳисоблангани маълум бўлди.
Худди шу каби қуйидаги ҳудудларда ҳам ортиқча маблағлар олинган:
- 12 та МФЙда (Оқолтин туманида 32 329 нафар аҳоли) — 76,9 миллион сўм;
- 9 та МФЙда (Боёвут туманида 27 949 нафар аҳоли) — 95,6 миллион сўм;
- 9 та МФЙда (Ховос туманида 17 307 нафар аҳоли) — 73,1 миллион сўм;
- 7 та МФЙда (Сирдарё туманида 19 833 нафар аҳоли) — 67,3 миллион сўм;
- 3 та МФЙда (Янгиер шаҳрида 14 464 нафар аҳоли) — 86,3 миллион сўм;
- 3 та МФЙда (Сардоба туманида 8 984 нафар аҳоли) — 5,2 миллион сўм;
- 3 та МФЙда (Ширин шаҳрида 7 620 нафар аҳоли) — 33,2 миллион сўм;
- 1 та МФЙда (Мирзаобод туманида 4 148 нафар аҳоли) — 31,1 миллион сўм;
- 1 та МФЙда (Сайхунобод туманида 3 069 нафар аҳоли) — 13,6 миллион сўм;
Умумий ҳисоб-китобларга кўра “Тоза ҳудуд” томонидан жами 51 та МФЙда 144 861 нафар истеъмолчига нисбатан 528,6 миллион сўм миқдорида ортиқча тўловлар ҳисоблагани аниқланди.
Юқоридагилардан келиб чиқиб, ҳудудий бошқарманинг махсус комиссияси томонидан “Тоза ҳудуд” ДУКка нисбатан “Истеъмолчилар ҳуқуқларини ҳимоя қилиш тўғрисида”ги қонуннинг 21-моддаси сотувчи (ижрочи) истеъмолчини ҳақ эвазига қўшимча товарлар сотиб олишга ёки қўшимча хизматлардан фойдаланишга қисташга, шунингдек кўрсатилмаган хизматлар учун ҳақ олишга ҳақли эмас) талаблари бузилгани юзасидан, тегишли тартибда иш қўзғатилди, ишни кўриб чиқиш натижасида 144 861 нафар истеъмолчи фойдасига 528,6 миллион сўм маблағ қайта ҳисоб-китоб қилиниши бўйича бажарилиши мажбурий бўлган кўрсатма берилди.
Изоҳ (0)