Surxondaryo viloyati “Toza hudud” DUKga ortiqcha olingan 3,2 milliard so‘m mablag‘ni iste’molchilarga qaytarish bo‘yicha ko‘rsatma berildi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.
Qo‘mitaning Surxondaryo viloyati hududiy boshqarmasi 2024-yil 2-yarim yillik ish rejasiga muvofiq Surxondaryo viloyati “Toza hudud” DUKda aholiga maishiy chiqindilarni to‘plash va olib chiqib ketish bo‘yicha ko‘rsatilayotgan xizmatlar sifati va holati hamda iste’molchilardan ko‘rsatilmagan xizmatlar uchun pul olish holati yuzasidan o‘rganish o‘tkazgan.
O‘rganish va tahlillarda mazkur viloyat “Toza hudud” DUK mavjud tartib-qoidalarga rioya qilmagan holda, ya’ni tartibga solinadigan narxlar (tariflar)ni deklaratsiya qilmasdan (tasdiqlamasdan) yoki kelishib olmasdan qo‘llanishi natijasida 522,6 million so‘m, ko‘rsatilmagan xizmat uchun 2,7 milliard so‘m, jami 3,2 milliard so‘m miqdorida ortiqcha daromad olingani holati aniqlangan.
Ma’lum qilinishicha, hududiy boshqarmaning maxsus komissiyasi tomonidan “Raqobat to‘g‘risida”gi qonunning 18-moddasi, “Iste’molchilar huquqlarini himoya qilish to‘g‘risida”gi qonunning 21-moddasi va Vazirlar Mahkamasining 722-sonli qarori bilan tasdiqlangan Nizomi talablari buzilgani alomatlari bilan “Toza hudud” DUKga nisbatan ish qo‘zg‘atilib, natijasi yuzasidan belgilangan tartibda moliyaviy jarima qo‘llanildi.
Shuningdek, 3,2 milliard so‘mdan ortiq mablag‘ni iste’molchilar foydasiga qayta hisob-kitob qilinishi bo‘yicha bajarilishi majburiy bo‘lgan ko‘rsatma berildi.
Bundan avval Sirdaryo viloyati “Toza hudud” davlat unitar korxonasi aholidan 500 million so‘mdan ortiq ortiqcha to‘lov olingani aniqlangandi.
Izoh (0)