Рақобат қўмитаси Uzum Market мурожаати асосида YandexGoʼга иш қўзғатди

“Рақобат тўғрисида”ги қонун талаблари бузилиши аломатлари билан YandexGoʼга нисбатан иш қўзғатилди.

Рақобат қўмитасига Uzum Market МЧЖ ХКнинг мурожаати келиб тушган бўлиб, мазкур мурожаатда YandexGo UB МЧЖ томонидан телевидение ҳамда ижтимоий тармоқлар орқали Yandex Маркет бўйича реклама ролигида YandexGo UB МЧЖ томонидан Uzum Market МЧЖ ХКга нисбатан инсофсиз рақобат ҳаракатларини амалга ошираётгани ҳамда унинг ишчанлик обрўсига путур етказаётганини маълум қилиб чора кўришни сўраган.

Юқоридагиларга кўра, қўмита махсус комиссияси томонидан YandexGo UB МЧЖга нисбатан “Рақобат тўғрисида”ги қонуннинг 21-моддаси талаблари бузилиши аломатлари билан белгиланган тартибда иш қўзғатилди.

Ушбу модда билан хўжалик юритувчи субъектлар ёки уларнинг манфаатларини кўзлаб бошқа шахслар томонидан рақобатчиларга нисбатан инсофсиз рақобатни амалга ошириш, шу жумладан қуйидаги ҳаракатларни амалга ошириш тақиқланган:

• рақобатчини обрўсизлантириш, яъни рақобатчи хўжалик юритувчи субъектнинг фаолиятига салбий таъсир кўрсатиши ёки унинг ишчанлик обрўсига путур етказиши мумкин бўлган, у сотувга таклиф қилаётган товарнинг сифати ва истеъмол хоссалари тўғрисида, мазкур товарни тайёрлаш ҳамда ундан фойдаланиш усуллари ва шароитлари ҳақида, ундан фойдаланишдан кутилаётган натижалар тўғрисида, товарнинг муайян мақсадларга яроқлилиги ҳақида, товарни сотувга таклиф этиш шартлари, шу жумладан унинг нархи тўғрисида ёлғон, ноаниқ ёки бузиб кўрсатилган маълумотларни тарқатиш;
• нотўғри таққослаш, яъни рақобатчи хўжалик юритувчи субъектни ёки унинг товарини товарнинг устунлиги ҳақида тасаввур ҳосил қилувчи сўзлардан ёки рамзлардан товарнинг холисона тасдиққа эга бўлган тавсифини ёки таққослаш параметрларини кўрсатмаган ҳолда фойдаланиб таққослаш;
• товарнинг хусусияти, ишлаб чиқарилиш усули ва жойи, истеъмол хоссалари, нархи ва сифати, ишлаб чиқарувчининг (бажарувчининг) кафолат мажбуриятлари хусусида истеъмолчиларни чалғитиш;
• тижорат сирини ёки қонун билан қўриқланадиган бошқа сирни, шу жумладан фан-техникага, ишлаб чиқаришга ёки савдога оид ахборотни эгасининг розилигисиз олиш, ундан фойдаланиш, уни ошкор этиш;
• товар ёки молия бозорига рақобатчи хўжалик юритувчи субъектнинг киришига тўсқинлик қилишга ёки уни бозордан четлаштиришга олиб келувчи ҳаракатларни содир этиш.

Қўмитанинг билдиришича, қўзғатилган ишни кўриб чиқиш якунлари юзасидан қўшимча ахборот тақдим этилади.