Жорий йил 15 июль куни Олий Мажлис Қонунчилик палатасида жамоат тартибини сақлаш ва ҳуқуқбузарликларнинг олдини олишга оид қонун лойиҳаси биринчи ўқишда кўриб чиқилди. Қуйи палата муҳокама жараёнини жонли эфирда намойиш этди.
Йиғилишда патрул-пост хизмати (ППХ) инспекторлари маъмурий баённома тузиш ҳуқуқига эгалиги, аммо қарор чиқариш бошқа мутасаддилар зиммасидалиги айтилди.
“Бу ҳолат уларнинг иш юкламаси ортишига ва жараён чўзилишига сабаб бўлмоқда. Профилактика инспекторлари бир йилда 2,5 миллиондан ортиқ маъмурий баённомалар тузяпти. ППХ бўлинмалари республиканинг 76 та шаҳар-туманларида хизмат олиб боради. Улар 2024 йил 1 июль ҳолатига кўра, 455 минг 323 та маъмурий баённома тузган. 2023 йилнинг ўзида 500 мингдан ортиқ маъмурий баённома расмийлаштирилган. Яъни ППХ ходимлари томонидан маъмурий ҳуқуқбузарликни аниқлаш ҳолатлари йилдан йилга ошиб бормоқда”, деди ички ишлар вазири ўринбосари Бекмурод Абдуллаев.
Таҳлил қилинишича, ППХ инспекторлари темирйўл, метрополитен ва шаҳар кўчаларида қоидалар бузилса, баённома расмийлаштира олмайди. Бу фуқаролар норозилигига сабаб бўлмоқда.
Янги қонун лойиҳасида қуйидаги янгиликлар назарда тутилган:
- Профилактика инспекторлари ва бош инспекторларга маъмурий ҳуқуқбузарликлар тўғрисидаги ишларни кўриб чиқиш ва чора қўллаш ҳуқуқи берилади.
- ППХ ва жамоат тартибини сақлаш раҳбарлари ҳам қарор қабул қилиш ваколатига эга бўлади.
- ППХ ходимларига Маъмурий жавобгарлик кодексининг 113-моддаси 4-қисми, 114, 115 ва 138-моддаларига оид ҳуқуқбузарликлар бўйича баённома тузиш ҳамда қарор қабул қилиш ваколати берилади. Шунингдек, йўл ҳаракати қоидаларини бузиш билан боғлиқ ҳуқуқбузарликлар учун пиёдалар ва йўл ҳаракатининг бошқа иштирокчиларига нисбатан маъмурий баённома тузиш ҳуқуқи тақдим этилади.
Қонун қабул қилинса, ППХ инспекторлари ўз ваколатлари доирасида тезкор қарор чиқариши, ҳуқуқбузарликка вақтида жавоб қайтарилиши ва жамоат хавфсизлиги кучайиши айтилди. Лойиҳа тегишли идоралар билан келишилган ва давлат бюджетига қўшимча юклама туширмаслиги таъкидланди.
Депутатлар қонун лойиҳасини биринчи ўқишда, саволларсиз ва бир овоздан мақъуллади. Ҳужжат иккинчи ва учинчи ўқишлардан сўнг Сенатга юборилиши мумкин.
Изоҳ (0)