Joriy yil 15-iyul kuni Oliy Majlis Qonunchilik palatasida jamoat tartibini saqlash va huquqbuzarliklarning oldini olishga oid qonun loyihasi birinchi o‘qishda ko‘rib chiqildi. Quyi palata muhokama jarayonini jonli efirda namoyish etdi.
Yig‘ilishda patrul-post xizmati (PPX) inspektorlari maʼmuriy bayonnoma tuzish huquqiga egaligi, ammo qaror chiqarish boshqa mutasaddilar zimmasidaligi aytildi.
“Bu holat ularning ish yuklamasi ortishiga va jarayon cho‘zilishiga sabab bo‘lmoqda. Profilaktika inspektorlari bir yilda 2,5 milliondan ortiq maʼmuriy bayonnomalar tuzyapti. PPX bo‘linmalari respublikaning 76 ta shahar-tumanlarida xizmat olib boradi. Ular 2024-yil 1-iyul holatiga ko‘ra, 455 ming 323 ta maʼmuriy bayonnoma tuzgan. 2023-yilning o‘zida 500 mingdan ortiq maʼmuriy bayonnoma rasmiylashtirilgan. Yaʼni PPX xodimlari tomonidan maʼmuriy huquqbuzarlikni aniqlash holatlari yildan yilga oshib bormoqda”, dedi ichki ishlar vaziri o‘rinbosari Bekmurod Abdullayev.
Tahlil qilinishicha, PPX inspektorlari temiryo‘l, metropoliten va shahar ko‘chalarida qoidalar buzilsa, bayonnoma rasmiylashtira olmaydi. Bu fuqarolar noroziligiga sabab bo‘lmoqda.
Yangi qonun loyihasida quyidagi yangiliklar nazarda tutilgan:
- Profilaktika inspektorlari va bosh inspektorlarga maʼmuriy huquqbuzarliklar to‘g‘risidagi ishlarni ko‘rib chiqish va chora qo‘llash huquqi beriladi.
- PPX va jamoat tartibini saqlash rahbarlari ham qaror qabul qilish vakolatiga ega bo‘ladi.
- PPX xodimlariga Maʼmuriy javobgarlik kodeksining 113-moddasi 4-qismi, 114, 115 va 138-moddalariga oid huquqbuzarliklar bo‘yicha bayonnoma tuzish hamda qaror qabul qilish vakolati beriladi. Shuningdek, yo‘l harakati qoidalarini buzish bilan bog‘liq huquqbuzarliklar uchun piyodalar va yo‘l harakatining boshqa ishtirokchilariga nisbatan maʼmuriy bayonnoma tuzish huquqi taqdim etiladi.
Qonun qabul qilinsa, PPX inspektorlari o‘z vakolatlari doirasida tezkor qaror chiqarishi, huquqbuzarlikka vaqtida javob qaytarilishi va jamoat xavfsizligi kuchayishi aytildi. Loyiha tegishli idoralar bilan kelishilgan va davlat byudjetiga qo‘shimcha yuklama tushirmasligi taʼkidlandi.
Deputatlar qonun loyihasini birinchi o‘qishda, savollarsiz va bir ovozdan maqʼulladi. Hujjat ikkinchi va uchinchi o‘qishlardan so‘ng Senatga yuborilishi mumkin.
Izoh (0)