Тармоқларда Фарғона шаҳрида икки нафар ички ишлар ходими ёш болали аёлни мажбурлаб, пост-патрул машинасига ўтқазаётгани акс этган видео тарқалган эди. Вилоят ИИБ ҳолат юзасидан маълумот берди.
Унга кўра, 18 сентябрь куни пост-патрул хизмати ходимлари Фарғона шаҳар И.Каримов ҳамда Қувасой кўчалари чорраҳасида хизмат олиб бораётган вақтда видеотасвирдаги аёл тиланчилик билан шуғулланаётганлиги учун у билан профилактик суҳбат ўтказиш мақсадида аёлдан йўлнинг қатнов қисмидан четга чиқиши сўралган. Бундан аёлнинг жаҳли чиқиб, ходимларга фаол қаршилик кўрсатган.
Аёлни ИИБга олиб кетмоқчи бўлишганда қўлидаги ёш боласини ерга ташлаб юбормоқчи бўлган пайт ходимлар томонидан ушлаб қолинган. Аммо ходимнинг кейинги хатти-ҳаракатлари жамоатчиликнинг ҳақли эътирозига сабаб бўлди.
Мазкур ҳолат юзасидан шу куннинг ўзида хизмат текшируви ўтказилиб, касб одоби ва этикасига амал қилмай, ноўрин ҳаракатлар содир қилган ППХ ходими эгаллаб турган лавозимидан бўшатилди.
Шунингдек, вилоят ИИБ барча шахсий таркиби юқоридаги каби ҳаракатларни содир этмасликлари юзасидан қатъий огоҳлантирилди.
Изоҳ (0)