АҚШ президенти Дональд Трампнинг оилавий бизнеси Trump бренди остидаги янги телефон ва хизматни ишга туширмоқда. Бу ҳақда BBC хабар берди.
Трампнинг ўғиллари томонидан бошқариладиган Trump Organization яқин келажакда олтин рангли смартфонни 499 доллар нарх билан маҳаллий бозорга чиқаришини маълум қилган. Шунингдек, ойига 47,45 долларлик мобил телефон хизмати ҳам тақдим этилиши очиқланган. Янгилик Трамп мамлакатнинг 45- ва 47-президенти бўлгани шарафига ишга туширилаётгани билдирилган.
“Трамплар оиласи президентнинг лавозимда ўтирган вақтида шахсан фойда кўришининг яна бир усулини яратганига ақл бовар қилмайди”, деди Вашингтондаги Citizens for Responsibility and Ethics ташкилотининг коммуникациялар бўйича директори Меган Фолкнер.
Мамлакатда эҳтимолий коррупция ва манфаатлар тўқнашувининг яна бир воситаси пайдо бўлмоқда, деган тушунчалар юзага келмоқда. Трамп ўзининг бизнес манфаатларини фарзандлари томонидан бошқариладиган трестга топширган. Оқ уй эса президент барча америкаликлар манфаатларини кўзлаб иш кўраётганини таъкидлаган.
Бу қарор Трамп Apple раҳбари Тим Кукни iPhone’ларни АҚШда ишлаб чиқаришга ундаётган бир пайтда қабул қилинди. Май ойида президент Америкада ишлаб чиқарилмайдиган iPhone’ларга камида 25 фоизлик импорт солиғи қўллаш билан таҳдид қилган эди. Таҳлилчиларнинг таъкидлашича, ҳозирда АҚШда смартфонларни йиғиш учун зарур бўлган юқори технологияли таъминот занжири йўқ.
Мобил хизматда саволларга жавоб бериш учун мижозларни қўллаб-қувватлаш хизмати ходимлари ишга туширилади. Шунингдек, ушбу олтин рангли телефонларга ҳозирда олдиндан буюртма бериш мумкинлиги билдирилган.
Изоҳ (0)