Сенаторлар уч ойдан ортиқ муддат чет элда бўлиб, Ўзбекистонга келганларни ОИВга мажбурий тиббий кўрикдан ўтказиш назарда тутилган қонунни маъқуллади.
Жорий йил 1 августда Сенатда одам иммунитет танқислиги вируси (ОИВ) тарқалишига қарши курашиш, хусусий бандлик агентликлари ва аҳоли бандлигига доир қонунларга ўзгартириш ва қўшимчалар киритишга доир қонун муҳокама қилинди.
Қонунга мувофиқ узлуксиз 90 кун ва ундан ортиқ муддат хорижда бўлиб қайтган 18–60 ёшлар оралиғидаги фуқаролар ҳамда чет элликлар ОИВга мажбурий тиббий текширувдан ўтказилади.
Бунда Ўзбекистон фуқаролари ва мамлакатда доимий яшайдиган фуқаролиги бўлмаган шахслар давлат бюджети маблағлари ҳисобидан текширилади. Ишлаш учун республикага келган чет элликлар ёки фуқаролиги бўлмаганлар, мамлакатда доимий яшайдиган хорижликлар эса ўз маблағлари, иш берувчининг ёки қонунчиликда тақиқланмаган бошқа маблағлар ҳисобидан кўрикдан ўтказилади.
“Бундан ташқари, ОИВ/ОИТС ва сил касаллиги аниқланиши Ўзбекистон ҳудудида меҳнат фаолияти ҳуқуқига доир тасдиқнома беришни рад этиш учун асос бўлиши белгиланмоқда”, дейилади Сенат хабарида.
Мажлисда Республика ОИТСга қарши курашиш маркази директори ўринбосари Баҳром Умаров хориждан келган фуқаро уч кун ичида текширувдан ўтиши шартлигини айтган.
“ОИВ ва сил касаллиги текширувидан ўтказиш ҳукумат томонидан белгиланади. Янги қонунга мувофиқ, фуқаро республика чегараларидан кириб келгани тўғрисида Давлат персоналлаштириш марказидан маълумот олинади. Шунинг асосида ўша кун ўзида бириктирилган тиббиёт ходими ва ички ишлар нозири томонидан фуқаро оила аъзолари билан профилактик тушунтириш ишлари ўтказилади. Фуқаро уч кун ичида тиббий текширувдан ўтиши шартлиги тўғрисида огоҳлантирилади. Ҳукуматда бу бўйича лойиҳа тайёрланган”, деган марказ масъули.
Қонунда Ўзбекистондан ташқарида иш қидираётганларни бораётган мамлакати қонунчилиги, давлатда бўлиш қоидалари бўйича ўқитишни ташкил этиш мажбурияти хусусий бандлик агентликларига бериладиган лицензия шартларидан бири этиб белгиланган. Муҳокама якунида қонун сенаторлар томонидан маъқулланган.
Таҳлилларга кўра, 2024 йилда Ўзбекистонга узоқ муддат чет элда бўлиб қайтган 1,7 миллион фуқаронинг фақат 434 минг нафари (25 фоизи) ихтиёрий равишда ОИВ/ОИТСга текширилган. Уларнинг 1 минг 512 нафарида мазкур касаллик аниқланган. Ўтган йили 12,7 мингдан ортиқ чет эл фуқаролари ва фуқаролиги бўлмаган шахслар ихтиёрий равишда ОИВ/ОИТСга текширилган. Улардан 81 нафари ҳам ушбу касалликка чалингани аниқланган.
Изоҳ (0)