Мелания Трамп, Ким Кардашьян, Виктория Бекҳэм. Машҳурлар қандай атирлардан фойдаланади?

Атир аёл кишининг феъл-атвори, қизиқиш ва диди ҳақида кўп сирларни ошкор қилади. Машҳур ва мухлислар учун севимли бўлган юлдузлар қандай ифорни хуш кўради ва қайси брендларнинг мухлиси ҳисобланади? Marie Claire нашри шу ҳақда материал тайёрлади.

Меган Маркл

Меган Маркл фойдаланадиган атирларнинг аксарияти — Jo Malone London брендига тегишли. Энг севимлилари икки инглиз маркаси: қўнғироқгул, марваридгул ва наъматак ифорининг умумлашмасидан ташкил топган Wild Bluebell ва денгиз ифорини ёдга солувчи Wood Sage & Sea Salt атири ҳисобланади.

Шунингдек собиқ актриса лимон, қорағат, апелсин ва бергамот ифорларидан ташкил топган универсал атир — Oribe’нинг Côte d’Azur’ини ҳам яхши кўради.

Женнифер Лопес

1991 йилда шоу-бизнесга қадам қўйган хонандани бугунги кунда танимайдиган одамнинг ўзи бўлмаса керак. Доим диққат марказида бўлган ижодкор ўзи асос солган Женнифер Лопез маркасидаги атирдан фойдаланишни хуш кўради. Ушбу атир уни сепган инсоннинг индивидуаллигига урғу беради.

Ўз маркасидаги ифорлардан энг кўп Glow, Live вa Still’ни маъқул кўради. Лопесга гуллар, айниқса, табаргул ифори жуда ёқади.

Мелания Трамп

АҚШ президенти Дональд Трампнинг рафиқаси классик француз атирларидан Chanel №5 ва италян атири Dolce&Gabbana’ни афзал билади.

Меланияга кўнгилга урмайдиган, аммо ўзига хос ҳид таралиб турадиган цитрус ва гул ифорлари композицияси ёқади.

Ким Кардашьян

Америкалик фотомоделнинг ҳам Женнифер Лопес сингари номи билан аталган атир бренди бор ва айнан ўша атирдан фойдаланишни маъқул билади. Шунга қарамасдан, бошқа брендларнинг ўзига жалб қиладиган ифорлари ҳам Кардашьян учун севимли бўлиши мумкин. Michael Kors брендига тегишли Michael атирини модель хуш кўрадиган ифорлар сирасига киритса бўлади.

Унга шарқона гул ноталари, Мадагаскар пушти қалампири ва грейпфрутли — аёлларга хос тараладиган шу билан бирга кундалик фойдаланиш учун ўткир бўлмаган ифорлар ёқади.

Виктория Бекҳэм

Собиқ хонанда ва модель айни дамда дизайнер сифатида яхши маълум бўлган Викториянинг ўз атир бренди бўлишига қарамай, бошқа маркаларнинг ҳам атирларидан фойдаланиб туради. Бекҳэм хоним атирини тез-тез алмаштириб туришини, аммо Vilhelm Parfumerie брендининг Rооm Service ифорини канда қилмаслигини билдирган.

Шунингдек у, энг қиммат атир бренди Clive Christian томонидан тақдим этиладиган ифорларнинг ҳам мухлиси ҳисобланади. Нархи 215 минг долларни ташкил қиладиган No.1 for Women атири Виктория учун энг севимли ифор ҳисобланади.