Каталониянинг “Барселона” клуби футболчиси Рафинья 2025 йилги “Олтин тўп” учун курашда жамоадоши Ламин Ямалнинг имкониятлари ҳақида фикр билдирди. Унинг таъкидлашича, индивидуал мукофотлардан кўра инсоний қадриятлар устувор аҳамиятга эга.
Бразилиялик футболчи “Олтин тўп” “Барселона” футболчисига берилиши керакми, деган саволга қуйидагича жавоб берди:
Менимча, бу мукофот адолатли тарзда топширилиши керак. Менинг қандай фикрда эканлигим кўп нарсани англатмайди. “Олтин тўп”ни ҳар қайси футболчи қўлга кирита олмайди. Шахсан мен учун эса энг муҳими — ўз уйимда, оилам, фарзандларим ва менга яқин инсонлар назарида дунёдаги энг яхши одам бўлиш.
Шунингдек, у жамоадоши Ламин Ямал ҳақида ҳам илиқ фикрлар билдирди:
Ямал — ажойиб футболчи. У узоқ йиллар давомида дунёнинг энг яхши футболчисига айланиши мумкин. Бу фақат ўзига боғлиқ. Чунки унда истеъдод бор. Ҳозир эса жуда кўп меҳнат қилиши керак, — деди Рафинья Спорт нашрига берган интервьюсида.
Эслатиб ўтамиз, “Барселона” ўтган мавсум Испания чемпионлиги, Испания Кубоги ва Суперкубогини қўлга киритган.
Изоҳ (0)