Туркия президенти Ражаб Тоййиб Эрдоғон Анқарада БМТнинг фаластинлик қочқинлар бўйича агентлиги (UNRWA) офиси очилишини эълон қилди. Бу ҳақда Al Jazeera хабар берди.
Туркия президенти Истанбулда бўлиб ўтган Ислом ҳамкорлик ташкилоти йиғилишида сўзга чиқди. Унда президент Исроилнинг UNRWA’ни тақиқлаш тўғрисидаги қароридан сўнг ташкилотга аъзо давлатларни кўпроқ ёрдам кўрсатишга чақирган.
“Биз фаластинлик қочқинларга ғамхўрлик қилиш нуқтаи назаридан беқиёс рол ўйнайдиган UNRWA’нинг Исроил томонидан йўқ қилинишига йўл қўймаслигимиз керак. Ҳар бир аъзо давлат Исроилнинг ўйинларини барбод қилиш учун агентликка молиявий ва маънавий ёрдам кўрсатиши керак”, деди Эрдоғон.
Президент, шунингдек, идоранинг очилиши Туркиянинг агентликни қўллаб-қувватлашини янада мустаҳкамлашини таъкидлаган. Мамлакат UNRWA’га 2023—2025 йиллар оралиғида йилига 10 миллион доллар ажратган эди. 2024 йилда Туркия агентликни 2 миллион доллар билан таъминлаган бўлса, AFAD офатларни бошқариш органидан яна 3 миллион доллар хайрия қилганди.
Изоҳ (0)