Ўзбекистонда коррупциявий хавф-хатар юқори бўлган лавозимлар рўйхати тузилди

Ўзбекистонда давлат органлари ва ташкилотлари функцияларидаги коррупциявий хавф-хатарлар даражаси аниқланди. Бу ҳақда Коррупцияга қарши курашиш агентлиги матбуот хизмати хабар берди.

Маълум қилинишича, президентнинг 2022 йил 11 майдаги қарорига мувофиқ, давлат органлари ва ташкилотлари, шу жумладан, маҳаллий ижро этувчи ҳокимият органлари фаолиятидаги коррупциявий хавф-хатарлар баҳолашдан ўтказилди.

Бу йил коррупциявий хавф-хатарларни баҳолашдан ўтказиш юзасидан электрон платформага юборилган маълумотлар асосида 92 та давлат ташкилотлари учун коррупциявий хавф-хатарлар хариталари тузилди.

2023 йилда 39 та вазирлик ва идора учун коррупциявий хавф-хатарлар хариталари тўлиқ шакллантирилиб, уларнинг фаолиятига доир умумий 1701 та функциядан 177 тасида коррупциявий хавф-хатарлар даражаси “юқори”, 475 тасида “ўрта”, 1049 тасида “паст” баҳоланган.

Якунда давлат ташкилотларининг Коррупцияга мойил бўлган муносабатлар электрон реестри, Коррупциявий хавф-хатарлар хариталари, Коррупцияга қарши курашиш бўйича дастурлар ва Коррупциявий хавф-хатар юқори бўлган лавозимлар рўйхати шакллантирилди.

“Таъкидлаш лозимки, давлат ташкилотларининг раҳбарлари ташкилот зиммасига юкланган функцияларда коррупциявий хавф-хатарларни баҳолашни ўз вақтида ва сифатли ўтказиш учун шахсан жавобгар саналади.

Коррупциявий хавф-хатар юқори функциялари кўп бўлган ташкилот ъэнг коррупциялашганъ, коррупциявий хавфи юқори бўлган лавозимдаги шахслар ''коррупционeр'' ёки аксинча коррупциявий хавф-хатари асосан ''паст'' бўлган ташкилотлар ''коррупциядан холи'' ҳисобланмайди”, — дейилади хабарда.

Қайд этилишича, ушбу ҳолатлар мазкур ташкилотларда назорат чоралари етарли йўлга қўйилгани ёки аксинча қўшимча назорат чоралари кўрилиши кераклигини, шу билан бирга, ташкилот раҳбарлари коррупциявий хавфи юқори бўлган жараёнлар (функциялар) ва функцияларни бажарувчи лавозимларни алоҳида назоратга олишига сигнал берувчи омил саналади.