Манфаатлар тўқнашуви тўғрисида хабар бермаган масъул шахслар жавобгарликка тортилади — Адлия вазирлиги

Бугун, 7 июнь куни Коррупцияга қарши курашиш агентлигида “Манфаатлар тўқнашуви тўғрисида”ги қонунга бағишланган матбуот анжумани бўлиб ўтди. Унда иштирок этган адлия вазири ўринбосари Алишер Каримов маълум қилишича, давлат органлари ва ташкилотларида манфаатлар тўқнашувини ҳисобга олиш реестри юритилади. Бу ҳақда “Дарё” мухбири хабар бермоқда.

Алишер Каримовнинг таъкидлашича, реестрга хабар берилган, аниқланган ҳамда тартибга солинган манфаатлар тўқнашуви тўғрисидаги маълумотлар киритиб борилади.

Манфаатлар тўқнашуви тўғрисида хабар бермаганлик учун базавий ҳисоблаш миқдорининг уч бараваридан (1 миллион 20 минг сўм) беш бараваригача (1 миллион 700 минг сўм) миқдорда жарима белгиланди.

Агарда ушбу хатти-ҳаракатлар бир йил давомида такроран содир этиладиган бўлса, беш бараваридан (1 миллион 700 минг сўм) ўн бараваригача (3 миллион 400 минг сўм) миқдорда жарима қўллашга сабаб бўлади.

Шунингдек, мансабдор шахслар томонидан мавжуд ёки эҳтимолий манфаатлар тўқнашувини тартибга солиш юзасидан чоралар кўрмаганлик учун базавий ҳисоблаш миқдорининг беш бараваридан (1 миллион 700 минг сўм) ўн бараваригача (3 миллион 400 минг сўм) миқдорда жарима белгиланди.

Агарда ушбу хатти-ҳаракатлар бир йил давомида такроран содир этиладиган бўлса, ўн бараваридан (3 миллион 400 минг сўм) ўн беш бараваригача миқдорда (5 миллион 100 минг сўм) жарима қўллашга сабаб бўлади, — деди адлия вазири ўринбосари.

Қўшимча қилинишича, маъмурий баённома расмийлаштириш билан боғлиқ вазифалар Коррупцияга қарши курашиш агентлиги томонидан амалга оширилади.

Бундан ташқари, коррупция ва манфаатлар тўқнашувига йўл қўйилган ҳолда тузилган битимлар суд тартибида ҳақиқий эмас деб топилади ҳамда битим бўйича барча олинган фойда давлат даромадига ўтказилади.

Маълумот учун, 2022—2023 йилларда давлат харидлари бўйича 4,5 мингта 573 миллиард сўмлик шартномалар манфаатлар тўқнашувига йўл қўйилган ҳолда тузилган.

“Манфаатлар тўқнашуви тўғрисида”ги қонунга кўра, давлат органларига ва маҳаллий давлат ҳокимияти органларига, давлат муассасаларига, давлат унитар корхоналарига, давлат мақсадли жамғармаларига, шунингдек устав фондида (устав капиталида) давлат улуши 50 фоиз миқдорда ва ундан ортиқ бўлган акциядорлик жамиятларига нисбатан татбиқ этилади.