Европа Иттифоқи ва Буюк Британия 11 июнь куни Испания ва Гибралтар ўртасида ҳеч қандай жисмоний тўсиқларсиз одамлар ва товарлар айланишини таъминлаш бўйича сиёсий келишувга эришди. Бу ҳақда Euronews хабар берди.
Европа комиссари Марош Шефчович буни “Европа Иттифоқи, жумладан, Испания, Буюк Британия ва Гибралтар учун ҳақиқий тарихий воқеа” деб атади.
Унга кўра, бу келишув Испания ташқи ишлар вазири Хосе Мануэл Альбарес, Буюк Британия ташқи ишлар вазири Девид Лемми ва Гибралтар бош вазири Фабиан Пикардо билан “муваффақиятли учрашув”дан сўнг амалга оширилган.
“Бу суверенитет, иш ўринлари ва ўсишни таъминлайдиган амалий ечим. Биз Гибралтар манфаатлари — Буюк Британия оиласининг бир қисми сифатида — ушбу келишувнинг марказида бўлишини таъминладик”, деди Лемми.
Буюк Британия ва Испания бир неча йиллардан бери икки мамлакат чегарасидан одамлар ва товарлар эркин ўтишини таъминлаш учун келишувга эришишга ҳаракат қилиб келган. Аммо қолган оғриқли нуқталардан бири бу ҳудуднинг чегараси қандай назорат қилиниши эди.
Барча томонлар Европа Иттифоқининг янги кириш ва чиқиш тизими кучга киргунга қадар келишувга эришишга шошилмоқда. Бу 2025 йилнинг октябрь ойига режалаштирилган. Буюк Британиянинг денгизорти ҳудуди ҳисобланган Гибралтар 1713 йилда мамлакатга берилган, аммо Испания бу ҳудудни ўзиники деб даъво қилар эди.
Битим Шенген ҳудуди, ЕИ ягона бозори ва божхона иттифоқини сақлаб қолади. Аммо Испания ва Гибралтар ўртасидаги ўтиш пунктларида барча жисмоний тўсиқлар, шахслар ва товарларни текшириш ва назорат қилишни олиб ташлайди. Текширувлар Гибралтар порти ва аэропортида амалга оширилади.
Испания ва Буюк Британия, шунингдек, ахборот алмашиш, мажбурий маслаҳатлашув механизми ва молиявий механизмни яратиш бўйича янги ҳамкорлик асосларини келишиб олган.
Изоҳ (0)