Yevropa Ittifoqi va Buyuk Britaniya 11-iyun kuni Ispaniya va Gibraltar o‘rtasida hech qanday jismoniy to‘siqlarsiz odamlar va tovarlar aylanishini ta’minlash bo‘yicha siyosiy kelishuvga erishdi. Bu haqda Euronews xabar berdi.
Yevropa komissari Marosh Shefchovich buni “Yevropa Ittifoqi, jumladan, Ispaniya, Buyuk Britaniya va Gibraltar uchun haqiqiy tarixiy voqea” deb atadi.
Unga ko‘ra, bu kelishuv Ispaniya tashqi ishlar vaziri Xose Manuel Albares, Buyuk Britaniya tashqi ishlar vaziri Devid Lemmi va Gibraltar bosh vaziri Fabian Pikardo bilan “muvaffaqiyatli uchrashuv”dan so‘ng amalga oshirilgan.
“Bu suverenitet, ish o‘rinlari va o‘sishni ta’minlaydigan amaliy yechim. Biz Gibraltar manfaatlari — Buyuk Britaniya oilasining bir qismi sifatida — ushbu kelishuvning markazida bo‘lishini ta’minladik”, dedi Lemmi.
Buyuk Britaniya va Ispaniya bir necha yillardan beri ikki mamlakat chegarasidan odamlar va tovarlar erkin o‘tishini ta’minlash uchun kelishuvga erishishga harakat qilib kelgan. Ammo qolgan og‘riqli nuqtalardan biri bu hududning chegarasi qanday nazorat qilinishi edi.
Barcha tomonlar Yevropa Ittifoqining yangi kirish va chiqish tizimi kuchga kirgunga qadar kelishuvga erishishga shoshilmoqda. Bu 2025-yilning oktyabr oyiga rejalashtirilgan. Buyuk Britaniyaning dengizorti hududi hisoblangan Gibraltar 1713-yilda mamlakatga berilgan, ammo Ispaniya bu hududni o‘ziniki deb da’vo qilar edi.
Bitim Shengen hududi, YI yagona bozori va bojxona ittifoqini saqlab qoladi. Ammo Ispaniya va Gibraltar o‘rtasidagi o‘tish punktlarida barcha jismoniy to‘siqlar, shaxslar va tovarlarni tekshirish va nazorat qilishni olib tashlaydi. Tekshiruvlar Gibraltar porti va aeroportida amalga oshiriladi.
Ispaniya va Buyuk Britaniya, shuningdek, axborot almashish, majburiy maslahatlashuv mexanizmi va moliyaviy mexanizmni yaratish bo‘yicha yangi hamkorlik asoslarini kelishib olgan.
Izoh (0)