Бугундан, яъни 20 июндан бошлаб давлат фуқаролик хизматчисига ўртача ойлик иш ҳақининг 30 фоизидан кўп бўлмаган миқдорда жарима қўлланилади. Бу ҳақда меҳнат ҳуқуқи бўйича мутахассис Саидали Мухторалиев “Дарё”га маълум қилди.
Саидали Мухторалиевнинг тушунтиришича, шу кунга қадар давлат фуқаролик хизматчиларига ҳам ҳамма ходимлар қатори Меҳнат кодексининг 312-моддасига кўра интизомий жазо чораси қўлланилган. Яъни:
Ўртача ойлик иш ҳақининг 30 фоизидан кўп бўлмаган миқдорда жарима. Ички меҳнат тартиби қоидаларида ходимга ўртача ойлик иш ҳақининг эллик фоизидан кўп бўлмаган миқдорда жарима солиниши ҳоллари назарда тутилиши мумкин.
Президент фармони билан миллий даражадаги давлат органлари давлат фуқаролик хизмати лавозимларининг давлат реестри тасдиқланди.
Кўп кутилган реестр тасдиқланди. Эндиликда давлат фуқаролик хизматчисига “Давлат фуқаролик хизмати тўғрисида”ги қонунинг 46-моддасида назарда тутилган интизомий жазо чоралари қўлланилади. Чунки қонун 3 йил аввал кучга кирган бўлса-да, реестр тасдиқланмагунча ушбу моддани қўллаб бўлмаган, деди Саидали Мухторалиев.
Давлат фуқаролик хизматчисига нисбатан қуйидаги интизомий жазо чоралари:
- ҳайфсан;
- ўртача ойлик иш ҳақининг ўттиз фоизидан кўп бўлмаган миқдорда жарима;
- малака даражасини пасайтириш;
- давлат фуқаролик хизмати лавозимини пасайтириш;
- эгаллаб турган давлат фуқаролик хизмати лавозимидан озод қилиш.
- Давлат фуқаролик хизматчисига нисбатан ушбу модданинг иккинчи қисмида назарда тутилмаган бошқа интизомий жазо чораларини қўллаш тақиқланади.
Саидали Мухторалиевнинг алоҳида таъкидлашича, “малака даражасини пасайтириш” ва “давлат фуқаролик хизмати лавозимини пасайтириш” янги жазо чоралари бўлиб, бу хизматчиларга катта масъулият юклайди.
Изоҳ (0)