Италиянинг кўплаб шаҳарларида ҳафта охирида кутилаётган экстремал иссиқлик туфайли “қизил” огоҳлантириш эълон қилинди. Бу ҳақда Anadolu хабар берди.
Италия Соғлиқни сақлаш вазирлиги ижтимоий тармоқларда яқин кунларда кўп шаҳарларга иссиқлик тўлқини кириб келиши кутилаётганини маълум қилган. Шунингдек, вазирлик томонидан аҳолига иссиқликдан сақланиш бўйича тавсия ва огоҳлантиришлар берилган.
Анкона, Болонья, Болсано, Брешия, Флоренсия, Фрозиноне, Латина, Милан, Неапол, Палермо, Перужа, Пескара, Рим, Турин, Триест, Венеция ва Верона шаҳарлари учун 28 июнь куни энг юқори хавф даражаси бўйича “қизил” огоҳлантириш эълон қилинган.
29 июнь куни эса Катания, Чивитавеккя, Риэти ва Витербо бу рўйхатга қўшилади. Оқибатда жами 21 та шаҳар жазирама хавфи остида қолади. Вазирликнинг таъкидлашича, хавфлилик даражаси “қизил” бўлган ҳудудларда иссиқ нафақат кексалар, болалар ва сурункали касалликларга чалинганлар, балки соғлом ва жисмоний фаол инсонлар учун ҳам жиддий хавф туғдириши мумкин.
Олдинроқ АҚШда 23 июнь куни очиқ ҳавода ўтказилган маросимдан сўнг жазирама туфайли 150 дан ортиқ кишининг аҳволи оғирлашгани айтилган эди. Аномал иссиқлик АҚШнинг ғарбидан шарқий қирғоғигача, шунингдек, Канаданинг Онтарио, Квебек ва Янги Шотландия ҳудудларига таъсир ўтказган. Ҳафта давомида 160 миллиондан ортиқ одам иссиқлик таъсирида қолган эди.
Изоҳ (0)