Тошкент ҳайвонот боғи ташкил қилинганига I аср тўлган бўлиб, маърифий ва илмий тадқиқот ишлари олиб борадиган муассаса ҳам ҳисобланади. Жониворларнинг 400 турга яқини сақланиб, улар орасида жазирамага мослашганлари ҳам ва аксинча, иссиқни унча ёқтирмайдиганлари ҳам мавжуд.
Ҳайвонот боғи 11 бўлимдан иборат бўлиб, ёз мавсуми учун мўлжалланган махсус тадбирлар ҳақида Маънавий ишлар бўлими ходими Минавар Таникулова “Дарё”га маълумот берди.
Ҳар йилги ёз мавсумида, қуёш қиздира бошлагач, ҳайвонлар учун салқинроқ жойлар ташкил этилади, махсус микроиқлим яратилади. Шундай қилинмаса, жониворлар ўзини лоҳас ҳис қилиб, ётиб олади, камҳаракат бўлиб қолади ва томошабинлар ўзлари кутган завқни ололмайди. Ўтган йили Жанубий Африкадан жирафа, зебра, оқ шер ва оқ йўлбарс харид қилинган.
Ҳайвонот боғида қиш ва ёз мавсумлари учун алоҳида тайёргарлик кўрилади. Боғ шаҳарнинг бошқа жойларига қараганда анча салқинроқ, сабаби бир тарафида Ботаника боғи, бошқа томонидан анҳор ўтган. Қўшимча равишда жониворлар учун ёзги волерларда соябонлар ва микроиқлим яратувчи мосламалар ўрнатилган. Қиш фаслида жониворлар ёпиқ волерларга ўтказилади. Иситиш тизими октябрь ойидан ишга туширилади.
Мутахассис жониворлар учун ёзда қандай шароитлар яратилгани ҳақида тўхталиб ўтди.
Ҳар бир қафасда сув ҳавзаси мавжуд, суви тез-тез алмаштириб, тозалаб турилади. Қўшимча тарзда жониворлар учун салқин хоналар бор, жуда исиб кетса, шу хонага киради. Рацион бўйича вақтида озиқлантирамиз, улар доим ветеринар врачлар назоратида, — деди мутахассис.
“Бенгал шери кўпайиб, насл қолдирувчи жонивор”, — Минавар Таникулова.
Халқ орасида “Тутқунликда ҳайвонлар кўпаймайди” деган қараш бор. Асосий мақсадимиздан бири — “Қизил китоб”га киритилган жониворларнинг сонини кўпайтириб, насл қолдиришини таъминлаш. Боғда бир жуфт Бенгал шери яшайди, бу жониворлар ҳам кўпайиб, насл қолдиради.
Ҳайвонат боғидаги йўлбарс Россиядан олиб келингани ҳақида маълумот берилди.
Россиядан олиб келинган Амур йўлбарсининг лақаби “Наврўз”. Тошкентга Наврўз кунида кириб келгани учун унга шу ном берилган. Жуфтини эса “Осиё” деб чақирамиз.
Ҳайвонларнинг туғилган куни ва байрам саналарига бағишланган шоу-дастурлари ва байрам “соҳиблари” учун алоҳида таом тайёрланиши ҳақида мутахассис қизиқарли маълумот бериб ўтди.
Ҳайвонот боғида жониворларнинг туғилган кунлари нишонланади. Филнинг туғилган кунида у севиб истеъмол қиладиган озуқаларига торт кўринишида шакл бериб, “совға” қилдик. Томошабинлар қарсаклар билан уни табриклашди. Шу билан бирга, байрамларда шоу-дастурлар уюштирилади, болалар ота-оналари билан келиб, завқ олиб, ҳордиқ чиқаришади.
Боғ ходимаси “Тропик капалаклар уйи” нега ёпилгани сабаби ҳақида айтиб ўтди.
Бундан 5-6 йил олдин ҳайвонот боғида экзотик капалаклар кўргазмаси ташкил этилган. “Капалаклар уйи” деб номланган ҳудудда уларнинг 50 турдан ортиғи намойиш қилинган. Ҳозиргача меҳмонларимиз “Капалаклар уйи”ни кўп сўрашади. Ўшанда бўлим карантин сабабли ёпилган эди. Ҳозир у ерда “Динозаврлар бўлими” фаолият юритмоқда. Бу бўлимни қайтариш ҳам режамизда бор.
“Жониворларнинг озуқасини ўлкамизга мослаштирамиз”
Биламизки, фақат ўз ўлкасида ўсадиган озуқани ейдиган ҳайвонлар бор. Энг ёқимтой панда – бамбук, коала эса эвкалипт баргларини ейди. Бизнинг минтақада бу ўсимликлар деярли учрамайди. Бундай жониворлар ўлкамизга мослаштирилади. Аввалига уларни ўзлари ўрганган озуқа билан боқамиз, аста-секин рационига ўзимизнинг минтақа ўсимликларини қўшамиз. Ва улар тезда мослашиб, егуликларни иштаҳа билан истеъмол қила бошлайди.
Ҳозирги кунда Тошкент ҳайвонот боғида Арангутан маймуни, Қамиш мушуги, Амур ва Бенгал йўлбарслари, кенгуру каби ноёб ҳайвонлар сақланади. Улар учун иқлимга мос шароитлар яратилади. Жониворлар боғ ветеринар врачлари томонидан эмланиб, турли касалликлардан ҳимояланади. Шунингдек, санитария кунида ҳайвонлар чўмилтирилиб, қафаслари ва озиқланадиган идишлари тозаланади.
Изоҳ (0)