Покистонда сўнгги ҳафтада жазирама иссиқ туфайли вафот этганлар сони салкам 600 нафарга етган. Бу ҳақда Покистон соғлиқни сақлаш бирлашмалари эълон қилган баёнотга асосланиб, BBC хабар берди.
Манбада айтилишича, Покистонда ўта иссиқ муҳит ва магнит бўронларининг мунтазам кузатилиши оқибатида саломатлик муаммоларига учраб вафот этаётганлар сони кўпайган. Сўнгги 6 куннинг ўзида 568 та ўлим ҳолати рўйхатдан ўтказилган.
Энг кўп ўлимлар мамлакат жанубида, Карачи шаҳрида кузатилган. Шаҳар касалхонасида кунига 30-40 та ўлим ҳолати қайд этилаётгани билдирилган.
Сўнгги 6 кунликдаги энг юқори ўлим кўрсаткичи 26 июнь куни кузатилган. Шу куни мамлакат бўйлаб жами 141 фуқаро ҳалок бўлган.
Покистон жанубида ҳозирда кунлик ўртача ҳарорат Цельсий шкаласи бўйича 40 градусдан пастга тушмаётгани айтилган. Ҳаводаги намлик миқдори эса кескин ошиб кетган.
Иссиқлик уришидан мурожаат қилган беморларнинг аксарияти 60 ёшдан юқори шахслар экани айтилган. Беморларда асосан қусиш, диарея ва юқори иситма каби ҳолатлар кузатилган.
Таҳлилчилар ўта иссиқ муҳитни иқлим ўзгариши билан баҳолаган. Ушбу иссиқ ҳаво массалари яна бир ҳафта давом этиши айтилган. Шу билан бирга, июнь ойи бошида бошқа бир жиддий муаммо — меъёрдан ортиқ ёмғир ёғишидан огоҳлантирилган. Йиллик меъёрдан 60 фоизга кўпроқ ёғингарчилик сув тошқинларига сабаб бўлиши айтилган.
Изоҳ (0)