Украина армияси бош қўмондони Александр Сирский тинчлик ўрнатилгандан кейин ҳам Россия ҳужумига тайёр туриш зарурлигини айтди. Бу ҳақда у “РБК-Украина”га берган интервьюсида маълум қилди.
Ҳозирда урушни тугатиш ва келажакда тинчлик битимини имзолаш бўйича дипломатик ҳаракатлар давом этмоқда. Жумладан, Украина президенти Владимир Зеленский 18 август куни Оқ уйда АҚШ президенти Дональд Трамп билан музокара олиб боради.
Келажакдаги барча кафолатларга, музокаралар жараёнига қарамай, биз доимо урушга тайёр туришимиз керак. Россия урушни давом эттириши ёки янги уруш бошлаши мумкин. Ҳатто тинчлик ўрнатилганда ёки уруш вақтинча тўхтатилганда ҳам армиямизнинг жанговар қобилиятини оширишимиз, уруш тажрибасидан сабоқ олишимиз ва энг замонавий, қудратли армия яратишимиз зарур. Менимча, душман жуда тез тикланиши мумкин, деди Сирский.
Генералнинг фикрича, Украина уруш сабоқларини унутмаслиги лозим, чунки хавф сақланиб қолмоқда ва Россия бутун Украинани босиб олиш ниятидан воз кечмаган. Сирский “май келишуви” ҳақида ҳам эслатиб ўтди.
Биз май ойидаги сулҳдан қандай фойдаланилганини биламиз: душман артиллерия ва дрон бўлинмаларини олдинги чизиқларга олиб чиқди. Бу ишни жанглар кечган пайтда амалга ошириб бўлмас эди. Россия қўшинларини қайта гуруҳлаб, дарҳол фаол ҳужум бошлади. Шунинг учун ҳар қандай воқеаларга тайёр бўлишимиз шарт, деди бош қўмондон.
Сирский “россияликларнинг яна 3, 5, 10 йил уришиш мумкинлиги” ҳақидаги баёнотларига ишонасизми, деган саволга “Бу, менимча, мақтанишъ” дея жавоб берди.
“Май келишуви” — Россия ва Украина ўртасида май ойида вақтинчалик жангларни тўхтатиш бўйича тузилган қисқа муддатли келишув бўлган. Аммо Сирскийга кўра, Россия бу вақтни тинчлик учун эмас, балки қўшинларини қайта жойлаштириш ва янги ҳужумга тайёрланиш учун ишлатган. Шу сабабли Украина ҳар қандай сулҳни эҳтиёткорлик билан қабул қилиш кераклигини таъкидламоқда.
Изоҳ (0)