Амстердам университети астрономлари ғайриоддий ТОI-2431 b экзосайёрасини кашф этишди. Бу сайёрада бир йил атиги 5,4 Ер соатида “ўтиб кетади”. У Ердан бор-йўғи 117 ёруғлик йили узоқликда жойлашган. Бу ҳақда arXiv препринтлар сайтида эълон қилинган мақолада маълум қилинган.
Ушбу объект NASA’нинг ТЕСС космик телескопи ёрдамида аниқланган. Олимларнинг айтишича, ТОI-2431 даги йил экзосайёранинг ўз юлдузи атрофида айланишининг энг қисқа даврларидан бири ҳисобланади. Таққослаш учун: Ер Қуёш атрофини айланиб чиқиши учун 365 кун сарфласа, ТОI-2431 b шу вақт ичида 1600 мартадан ортиқ айланишга улгуради.
Сайёра ўз юлдузига жуда яқин - атиги 933 минг километр (0,0063 астрономик бирлик) масофада жойлашган. Бундай яқинлик унинг сиртини тахминан 2000 Келвин (1727 °C атрофида) даражасигача қиздиради. Бу ҳарорат тошлар ва металларни эритиш учун етарли.
Сайёранинг ўлчами Ерга ўхшаш бўлса-да, ТОI-2431 b хусусиятлари жиҳатидан ундан кескин фарқ қилади. Унинг радиуси деярли бир ярим баробар, массаси эса 6,2 марта катта. Ўртача зичлиги бир куб сантиметрга 9,4 граммни ташкил этади - бу Ерникидан анча юқори.
Яқин юлдуз томонидан ҳосил қилинган кучли тортишиш кучлари туфайли сайёранинг шакли ўзгарган. Олимларнинг тахминига кўра, унинг ўқларидан бири иккинчисидан тахминан 9 фоизга қисқароқ бўлиб, бу ТОI-2431 b га мукаммал сферик эмас, балки яссиланган шакл беради.
Шунингдек, тадқиқотчиларнинг фикрича, сайёра ҳалокатга учраши мумкин. Олимларнинг ҳисоб-китобларига кўра, 31 миллион йилдан сўнг у ўз юлдузи томонидан ютиб юборилади. Бу ўта қисқа айланиш даврига эга сайёраларда кузатилган энг қисқа “гравитацион парчаланиш” муддатларидан биридир.
Изоҳ (0)