YouTube раҳбарияти нореал видеолар билан курашиш мақсадида платформанинг қоидаларига ўзгартириш киритади. Бунда гап нейротармоқлар ёрдамида яратилган видеороликлар ҳақида кетмоқда. Шу тариқа видеохостинг ўз обрўсига путур етказиши мумкин бўлган ҳолатларнинг олдини олади. Бундай контентларнинг муаллифлари даромадини камайтириш орқали молиявий харажатлар ҳам қисқартирилади.
YouTube монетизация қоидалари 2025 йил 15 июлда янгиланади. Платформада қайси видеолар монетизация қилиниши мумкинлиги ва қайсилари мумкин эмаслиги ҳақида батафсил кўрсатмалар ва таърифлар пайдо бўлади. Ҳозирча янгиликлар ҳақида аниқ маълумотлар йўқ, аммо компаниядагиларнинг айтишича, уларнинг сиёсати ҳар доим оригинал ва ҳақиқий контентни юклашни назарда тутган. Ўзгаришлар бу жиҳатни сунъий интеллект томонидан яратилган видеолар учун ҳам аниқлаштиради.
YouTube муаллифлари аллақачон видеохостинг ғояси уларнинг даромадини жиддий чеклаб қўйишидан хавотирланиб, бонг ура бошлади. Шу билан бирга, платформа вакиллари янгиланган қоидалар уларнинг даромадларига таъсир қилмаслиги кераклигини айтиб, блогерларни тинчлантирмоқда. Бунга таҳририят ва муаллифлар билан ишлаш бўлими бошлиғи Рене Ричи қуйидагича аниқлик киритди: янгилик аҳамиятсиз. Бу фақат қайси контент “оммавий ишлаб чиқарилган” ёки “такрорий” эканини яхшироқ аниқлашга ёрдам беради.
Ричининг айтишича, томошабинлар спам деб ҳисоблагани учун оригинал бўлмаган видеолар анчадан бери монетизация қилинмаяпти. Шу билан бирга, у сўнгги пайтларда сунъий интеллект ёрдамида видео яратиш имкон қадар осонлашгани ва бундай видеолар тармоқни тўлдириб юборгани ҳақида гапирди. Кўпчилиги миллионлаб кўришларни тўпламоқда, баъзилари эса Google’нинг Veo 3 каби воситаси туфайли жуда ҳақиқатга ўхшаб кўринмоқда.
Шу сабабли, YouTube бўлажак ўзгаришларнинг аҳамиятини камайтирмоқчи бўлса-да, аслида сунъий интеллект видеоларининг кўплиги туфайли кўплаб муаллифлар зарар кўради. Бироқ, бундай контентнинг назоратдан ташқари кенгайиши пировардида компаниянинг ўзига обрў ва молиявий жиҳатдан зарар етказиши мумкин. Шунинг учун компаниянинг нейроконтент ва унинг муаллифларини тартибга солиш учун аниқ қоидаларни белгилашдан бошқа чораси йўқ.
Изоҳ (0)