Жанубий кореялик актёр Ли Бён Хон америкалик бошловчи Жимми Феллоннинг Тhe Tonight Show дастурида меҳмон бўлиб, оиласида юз берган қизиқарли ҳолатни айтиб берди.
Актёрнинг ўғли отасининг “Калмар ўйини” сериалида суратга тушганини синфдошларидан билиб қолган ва сериални кўргач, отасига бўлган муносабатини ўзгартирган.
Ли Бён Хоннинг сўзларига қараганда, бир куни мактабдан хафа бўлиб қайтган 10 ёшар ўғли ундан: “Нега сиз бунчалар ёвуз одамсиз?” деб сўраган. У буни сериалдаги отасининг қаҳрамони — ниқобли бошқарувчининг жуда кўп одамни ўлдиргани билан изоҳлаган. Актёр бундан ҳайрон қолган бўлса-да, вазиятни тушунтиришга ҳаракат қилган:
“Бу фақат актёрлик иши. Мен бу образни ижро этганман. Бу менинг аслим эмас” деган, бироқ бола бунга ишонмаган.
Маълумот учун, “Калмар ўйини” Netflix платформасида 2021 йилда чиқиб, глобал миқёсда катта шов-шувга сабаб бўлган. Сериал 94 мамлакатда трендга чиққан ва биринчи ойда 111 миллиондан ортиқ томошабинни жалб қилган.
Жорий йил 27 июнда эса “Калмар ўйини”нинг якуний учинчи мавсуми катта шов-шув билан тақдим этилди. Премьерадан сўнг атиги уч кун ичида янги фасл 60,1 миллион марта томоша қилинди. Бу кўрсаткич уни қисқа муддат ичида энг кўп кўрилган сериалга айлантирди.
Сериалнинг иккинчи мавсуми ҳам ўз вақтида юқори натижаларга эришган — премерадан кейинги дастлабки тўрт кун ичида 68 миллион марта кўрилган ва илк ҳафтасидаёқ рейтингда биринчи ўринга чиққан. Бу натижа ҳатто илгари етакчилик қилган “Уэнздей” сериалидан (50,1 миллион кўриш) ҳам юқори бўлган эди.
Изоҳ (0)