Сўнгги йилларда Ўзбекистонда ёшларнинг жамиятдаги ўрни ва давлат бошқарувидаги иштироки сезиларли даражада кенгайиб, бу борада тизимли ишлар амалга оширилмоқда. Ёшларга янги имкониятлар яратиш, уларнинг ташаббусларини қўллаб-қувватлаш мақсадида ҳар йили ўнлаб қонунчилик ҳужжатлари қабул қилинмоқда.
Давлатимиз раҳбари “ёшларни халқимизнинг олтин фонди,” деб таъкидлаб, ёшлар масаласини давлат сиёсатининг устувор йўналиши сифатида белгилаб келмоқда. Бу ёндашув “Ўзбекистон–2030” стратегиясида ҳам ўз ифодасини топган бўлиб, унинг унда белгиланган асосий вазифалар ёшлар манфаатларига қаратилган.
Парламентда ёшлар масалалари бўйича комиссия ва Ёшлар парламенти орқали ёшлар овози давлат қарорларига етказилиб, уларнинг ташаббуслари қўллаб-қувватланмоқда.
Ўзбекистон аҳолисининг 60 фоизини ёшлар ташкил этади. Ҳар йили меҳнат бозорига 600 мингдан ортиқ ёшлар қадам қўймоқда ва бу рақам 2030 йилда 1 миллионга етиши кутилмоқда. Ёшлар бандлигини таъминлаш ва тадбиркорликни ривожлантириш мақсадида амалга оширилган ислоҳотлар натижасида сўнгги 8 йилда ёш тадбиркорлар сони 3 баравар ошди, ишсиз ёшлар сони эса 2 баравар камайди.
Ёшларни қўллаб-қувватлашнинг самарали механизми сифатида “Ёшлар дафтари” орқали 180 мингдан ортиқ ёшга 345 миллиард сўмлик ёрдам кўрсатилди. “Ёшлар баланси” асосида ёшлар учта тоифага – “яхши”, “ўрта” ва “оғир” тоифага ажратилиб, эътибор марказига олинди. Айниқса, “оғир” тоифадаги 400 мингга яқин ёшга давлат томонидан кенг кўламли ёрдам кўрсатилди.
Сўнгги йилларда олий таълим муассасалари сони 3 баравар ошди ва ёшларнинг 42 фоизи олий таълим билан қамраб олинди. Хотин-қизлар учун шартнома тўловларини давлат қоплаб бериши натижасида уларнинг сони
11 баравар кўпайди. Ёш олимлар сони 2 баравар ошиб, 4 минг нафардан ортиб кетди. Шунингдек, хориждаги нуфузли университетларда таҳсил олаётган талабаларимиз сони ва “Эл-юрт умиди” орқали хорижда билим олаётганлар сони ортиб бормоқда.
Ёшлар агентлиги ҳузурида 100 миллион долларлик жамғарма тузилди. Ёш тадбиркорларга 2,5 миллиард сўмгача имтиёзли кредитлар ва 2 миллиард сўмгача стартап сармоялари йўналтирилмоқда. Миллий банк ва Алоқабанк орқали ёшлар бизнеси ва стартаплари қўллаб-қувватланиб, микроқарзлар ва имтиёзли кредитлар ажратиб бериляпти.
Креатив иқтисодиётда фаолият юритаётганларнинг 98 фоизи ёшлар ҳисобланади. IT соҳасида “Бир миллион дастурчи” лойиҳаси кенг қамровга эга бўлиб, яна 300 минг ёш у орқали рақамли кўникмаларга эга бўлади.
Ёшларда ватанпарварлик туйғусини мустаҳкамлаш мақсадида “Ватан таянчи” ҳаракати ташкил этилиб, унда 1 миллиондан зиёд ёшлар қатнашмоқда. Спорт орқали тарбия ва соғлом турмуш тарзига йўналтирилган “Шижоат ва ғайрат” мусобақалари орқали ғолиб маҳаллаларда спорт инфратузилмалари барпо этилмоқда.
Бугунги кунда давлат томонидан амалга оширилаётган кенг қамровли чора-тадбирлар ёшларимизнинг салоҳиятини рўёбга чиқариш, уларнинг орзу-интилишларини қўллаб-қувватлаш ва Янги Ўзбекистон тараққиётига ҳисса қўшиши учун мустаҳкам замин яратмоқда. Ёшларимиз миллий ривожланишнинг асосий ҳаракатлантирувчи кучи сифатида мамлакат тараққиётида муҳим ўрин эгаллаб бормоқда.
Ражабоев Дилмурод
Ҳуқуқшунос, эксперт
Изоҳ (0)