“Ҳар ерни қилма орзу” — Голливуд юлдузлари кино олами ва машҳурлик ортидаги разилликлар ҳақида

Кўпчилик ўз ишининг қанчалик қийин эканлигидан нолийди. Бизни худбин раҳбарлар, паст ойлик маош, эрта туриб тиқилинч транспортда ишхонага бориш, иш кунининг зерикарли ўтиши каби омиллар чарчатади. 

Тасаввур қилинг, сиз бир ондаёқ машҳур шахсга айландингиз, кинокомпаниялар сизнинг биргина ролингиз учун минглаб доллар гонорар беришга тайёр. Бу кўпчилик учун гўёки орзудаги ҳаёт. Бироқ бундай ҳаётдан ҳам нолийдиганлар топилади. Қуйида Голливуд юлдузларининг кино олами ва шон-шуҳрат ортида кўпчилик билмайдиган ҳақиқатлари келтирилади.

Элайжа Вуд

Болалигидан кинода суратга тушган Элайжа бир неча бор кинематографияда болаларни эксплуатация қилиш ҳақида гапирган ва ёш актёрларни яхшироқ ҳимоя қилишни ёқлаб чиққан.

“Голливудда қандайдир ёмон нарса содир бўлгани аниқ. Бу соҳада илонлар, фақат ўз манфаатини ўйлайдиган одамлар кўп. Унинг тубида қоронғилик бор. Бундай вазиятларда мени хафа қиладиган нарса шуки, жабрланувчилар ҳокимиятдаги одамлар каби баланд овозда гапира олмайди. Бегуноҳ одамлар билан нима содир бўлаётганини фош қилишга уринишнинг фожиаси шундаки: уларни эзиб ташлаш мумкин, аммо уларнинг ҳаёти тузатиб бўлмас даражада издан чиқади”, деган эди Вуд 2016 йилда.

Риз Уизерспун

2017 йилда Риз 16 ёшида бир режиссёр томонидан тажовузга учраганини тан олди.

“Ухлашим қийин, ўйлашим қийин, ташвиш, ўз вақтида гапирмаганим учун ўзимда бўлган кўп ҳис-туйғуларимни изҳор қилишда қийналаман. Менга тажовуз қилган одамга нисбатан ҳақиқий нафрат, ҳамда жим бўлишим эвазига ишда қолишимни ҳис қилишга мажбур қилган агентлар ва продюсерларга нисбатан нафрат ҳис қиляпман”, деди юлдуз.

Ҳоакин Феникс

Ҳоакин узоқ вақтдан бери шуҳрат билан боғлиқ ноқулайлик ҳақида гапириб келмоқда. 2014 йилда у мухлислари кўчада расм олиш учун унинг ёнига келганида ваҳимага тушишини айтган эди. “Оскар” совриндори А тоифали актёрлар дуч келадиган шахсий ҳаёт дахлсизлигининг йўқлигини кўп марта қоралаган.

“Машҳурлик кўпинча шахсий ҳаёт ва анонимликнинг йўқолишидир. Бироқ бунинг ижобий томони ҳам бор — сиз қилган ишларингиз учун жамоатчилик ҳурмати ва миннатдорчилигига сазовор бўласиз”, дея ўз фикрини билдирди Феникс 2023 йилда.

Шарлиз Терон

2017 йилда Шарлиз Голливудни қолоқ деб атаб, аёлларга камдан кам ҳолларда катта бюджетли фильмларни суратга олишга рухсат берилишини таъкидлади.

“Бизда шундай даврлар бўлдики, аёллар ўзларини намоён қилиб, шиша шифтларни синдиргандай бўлишди. Аммо кейин буни давом эттира олмадик. Ёки битта муваффақиятсиз фильм туфайли тўсатдан ҳеч ким бош ролни аёл ижро этадиган лойиҳани суратга олишни хоҳламай қолди. Мен ‘Мўжизакор аёлʼ фильми бюджетидан юқори маблағ билан аёлларга ишлашга рухсат бермаган саноатнинг бир қисми эканлигимдан уяламан. Бу жуда ибтидоий туюлади”, дея фикрларини баҳам кўрди “Оскар” мукофоти соҳибаси.

Жиллиан Андерсон

1990 йилларда Жиллиан “Махфий ҳужжатлар” сериали бўйича ҳамкасби Девид Дуҳовни билан тенг маош олиш учун қатъий курашган эди. Бироқ йиллар ўтиб, у яна худди шу вазиятга дуч келди: унга “Махфий ҳужжатлар” қайта суратга олиниши учун Девидга нисбатан икки баравар кам ҳақ таклиф қилишди.

“Айниқса, ҳозирги шароитда, аёллар тенг бўлмаган иш ҳақи ҳақида гапираётган бир пайтда, бу масалани кўтариб чиқиш ва эшитилиши жуда муҳим. Ўтмишда бизга адолатли ҳақ тўлашлари учун жуда кўп меҳнат қилганман. Бу масала устида узоқ ишладим ва ниҳоят ниманидир ўзгартира олдим. Энди эса яна ўша аҳвол такрорланди! Бу ҳақда нима дейишни ҳам билмайман”, деди актриса.

Aманда Сайфред

Аманда юқори бюджетли фильмда қатнашганида унга эркак ҳамкасби олган пулнинг ўндан бир қисмигина тўланган. Бу эса ўша пайтда иккаласи ҳам Голливудда жуда машҳур бўлишига қарамай содир бўлган.

“Менимча, одамлар мени кўнгли очиқ ва ижобий инсон бўлганим учун улар таклиф қилган ҳар қандай суммани қабул қилаверади, деб ўйлашади. Масала қанча пул олишда эмас, балки бу қанчалик адолатли эканлигида”, дея таъкидлади юлдуз.

Меган Фокс

15 ёшида актёрлик фаолиятини бошлаган Меган Голливудни “аёлларга нисбатан нафратли” деб атайди ва кино саноатида ёшлигиданоқ ўзини буюм сифатида кўришгани ҳамда жинсий объектга айлантиришганини таъкидлайди.

“Менимча, мен МеТоо ҳаракатидан деярли ўн йил олдин бу ҳақда гапира бошлаганман. Мен доимо Голливудда 2008 ва 2009 йилларда содир бўлган баъзи ҳақоратли, патриархал ҳодисаларга қарши чиққанман, одамлар буни қабул қилишга ёки чидашга тайёр бўлишидан анча олдин. Ва бунинг учун мени масхара қилишган”, деб эслайди Фокс 2022 йилда.