Финляндияда дунёдаги энг катта қум батареяси ишга тушди. У углерод чиқиндиларини йилига тахминан 160 тоннага камайтириши кутилмоқда. Бу ҳақда IFLScience хабар берди.
Баландлиги 13 метр ва кенглиги 15 метр бўлган қум батареяси Финляндиянинг жанубида жойлашган Порнаинен муниципалитетида қурилган. Янги тизим 1 мегаватт иссиқлик энергиясини етказиб бериш ва 100 мегаватт соатгача энергияни сақлашга қодир. Бундан ташқари у иссиқлик чиқиндиларини деярли 70 фоизга камайтиради.
Қум батареяси нима?
Қум батареяси сиғими катта бўлиб, у тахминан 2000 тонна майдаланган совун тоши билан тўлдирилган бўлади. Совун тоши стеатит деб ҳам аталади ва иссиқликни ютиш қобилияти билан машҳур бўлган метаморфик жинс ҳисобланади.
Иссиқлик энергияси қувурлар тизими бўйлаб тош материал орқали ҳайдалади. У қувурда соатлар, кунлар, ҳатто ҳафталар давомида ушлаб турилади. Энергия қайноқ сув ва буғ кўринишида чиқарилади. Улардан саноатда ёки сувли иситиш тизимларида фойдаланиш мумкин бўлади.
Қумли батареяларнинг фойдаси нима?
Қум батареяси ортиқча яшил энергияни сақланадиган иссиқликка айлантириб, қайта тикланадиган энергия манбаларидан максимал даражада фойдаланишга ёрдам беради. Дунё тобора кўпроқ қуёш ва шамол каби тоза энергия манбаларига интилмоқда. Аммо уларнинг асосий камчилиги шундаки, улар фақат қуёш порлаганида ёки шамол эсганида энергия ишлаб чиқаради. Қум батареяси эса бу муаммони ҳал қилади.
“Бизнинг мақсадимиз 2035 йилга бориб иқлимга нисбатан салбий таъсирни камайтириш. Қум батареяси бунга эришишдаги катта қадамдир”, деди компания бош директори Микко Паажанен.
Қум батареялари электр энергияси компанияларига рақобатбардош устунлик бериб, электр тармоқларини барқарор сақлашга ёрдам беради. Унинг катта сақлаш ҳажми электр тармоғига талаб паст бўлганда ортиқча энергияни сақлаш, сўнгра талаб кескин ошганда ундан фойдаланиш имконини беради.
Изоҳ (0)