Бухоро вилояти Жондор туманида эркак Ўзбекистон Қизил китобига киритилган бўз эчкиэмар оғзига нос солиб, шафқатсиз муносабатда бўлгани ҳақида хабар берилганди. Бухоро вилояти судлари ҳолат юзасидан унга қандай чора кўрилганини маълум қилди.
Маълум қилинишича, суд залида ҳуқуқбузар 1 июнь куни “Ибн Сино” МФЙга қарашли дала шийпонига ўзининг қўйларини қамаш учун келганини, у ерда эчкиэмарни кўриб қолганини, бошига таёқ билан уриб қўлига ушлаб олганини, кейин оғзига мажбурлаб носвой солганини, эчкиэмар 10-15 дақиқа хушсиз ҳолатда қолиб кейинчалик юриб кетганини, шундан сўнг эчкиэмарни олиб кўл қирғоғига отиб юборганини, бу ҳолатларни ўзининг шахсий телефонига видеога олиб, Instagram ижтимоий тармоғига жойлаштирилганини, эчкиэмарни ўлдирмаганини, лекин унга нисбатан шафқатсиз муносабатда бўлганини тан олди.
У айбига иқрорлигини, қилмишидан пушаймонлигини инобатга олиб қонуний енгиллик берилишини сўраб кўрсатма берди. Унга нисбатан Маъмурий жавобгарлик тўғрисидаги кодекснинг 111-моддаси 1-қисми билан базавий ҳисоблаш миқдорининг 4 баравари яъни 1,5 млн сўм жарима жазоси тайинланди.
Куни кеча Тошкентдаги бозорда илоннинг бошини узиб, уни сўйган қизга чора кўрилган эди. Тошкентдаги боғда эса одамлар орасида баҳайбат илон ўрмалаб кетаётгани акс этган видео юзасидан изоҳ берилганди.
Хоразм вилоятининг Урганч шаҳрида ноқонуний сақланаётган шер ҳайвонот боғига топширилган эди. Шунингдек, Тошкент шаҳар Олмазор туманида фуқаро ўз уйида Қизил китобга киритилган қушларни сақлаб келаётгани аниқланганди.
Изоҳ (0)