Қашқадарё вилоят Экология, атроф муҳитни муҳофаза қилиш ва иқлим ўзгариши бошқармаси “Қизил китоб”га киритилган эчкиэмарларга қирғин келтираётган броконьер қилмишини фош қилди. Бу ҳақда “Дарё”га бошқарма ахборот хизмати раҳбари Карима Ёдгорова хабар берди.
Маълум бўлишича, вилоят Экология, атроф-муҳитни муҳофаза қилиш ва иқлим ўзгариши бошқармаси ҳамда ИИБ ходимлари ҳамкорлигида 2023 йил 14 июнь куни Касби туманида броконьерликка қарши курашиш мақсадида назорат тадбири ўтказилган.
.jpg)
“Назорат тадбирида ‘Касби‘ МФЙ, Обод маҳалла кўчасида яшовчи фуқаро М.I. яшаш хонадонида Ўзбекистон Республикаси ‘Қизил китоб’и ҳамда CITЭС Конвенция сининг иловасига киритилган бўз эчкиэмарларни тутқунликда сақлаб, уларни ваҳшийларча нобуд қилаётгани аниқланди”, — дейилади бошқарма ахборотида.
Тезкор тадбирда 20 та эчкиэмарнинг тутқунликда сақланаётгани, 43 та эчкиэмар эса ўлдирилиб, териси шилиб олингани маълум бўлган.
“Мазкур ҳолат бўйича тегишли тартибда ҳужжатлар расмийлаштирилиб, фуқародан 20 та тирик эчкиэмар ва 43 та эчкиэмар териси ашёвий далил сифатида олиб қўйилди. Тирик бўлган 20 та бўз эчкиэмар ўзининг яшаш муҳити бўлган Муборак туманидаги чўл ҳудудларига қўйиб юборилди”, — дейди бошқарма ахборот хизмати раҳбари Карима Ёдгорова.
Қўшимча қилинишича, ҳолат бўйича Ўзбекистон Республикаси “Экологик назорат тўғрисида”ги қонунининг 25-моддаси, “Табиатни муҳофаза қилиш тўғрисида”ги қонуннинг 47-, 49- ва 50-моддалари, “Ҳайвонот дунёсини муҳофаза қилиш ва ундан фойдаланиш тўғрисида”ги қонунининг 51- ва 53-моддалари, Жиноят кодексининг 202-моддаси, шунингдек, Вазирлар Маҳкамасининг 2014 йил 20-октябрдаги қарорида тасдиқланган “Ҳайвонот дунёси объектларидан фойдаланиш ва ҳайвонот дунёси объектларидан фойдаланиш соҳасида рухсат бериш тартиб-таомилларидан ўтиш тартиби тўғрисида”ги низомга асосан ҳуқуқбузарга ҳайвонот дунёсига етказилган жами 311 миллион 850 минг сўм зарар ҳисобланиб, расмийлаштирилган ҳужжатлар прокуратурага тақдим этилган.
Изоҳ (0)