Бир футболчи тарихи. «Реал»дан бадарға қилинган «биллур оёқ»ли Гарет Бэйл ҳақида

Гарет Бэйл 2021 йилнинг февраль ойи ўрталарига қадар «Тоттенҳэм» таркибида атиги 17 учрашувда қатнашиб («шпорлар» 41 учрашув ўтказган), атиги 783 дақиқа ҳаракат қилди, шу билан бирга шундан 50 фоиздан кўпроғи Европа Лигаси ўйинларига тўғри келди. Премьер Лигада ҳам уэлслик жуда кам дақиқаларга эга бўлаётганди. Кўпчилик Гаретнинг Англия Кубоги доирасида ўтказилган «Эвертон»га қарши ўйинда майдонга тушишини кутганди, аммо у «Тоттенҳэм»нинг ўйин учун қайдномасидан ҳам ўрин олмади. «Шпорлар» бош мураббийи Жозе Моуриньо ўйиндан сўнг бунга қуйидагича изоҳ берди:

«Якшанба куни биз «Вест Бромвич»га қарши ўйнадик ва Гарет бутун ўйинни захира ўриндиғида ўтказди. Душанба куни мен унинг ўзини ноқулай ҳис қилгани туфайли текширувдан ўтмоқчи эканлигини билганимда жуда ҳайрон бўлдим. У душанба куни биз билан машғулот ўтказмади, сешанба куни қайтди, аммо яна бир неча кун давомида шифокорлар билан ишлашни хоҳлаётганини айтди. Шунинг учун у бугун биз билан бирга бўлмади. Бэйлнинг аниқ жароҳати йўқ, аммо у ўзини ноқулай ҳис қилмоқда ва машғулот ритмига ҳам эга эмас».

Аммо Гарет кутилмаганда «Тоттенҳэм»нинг сўнгги ўйинларида фаоллашиб қолди. У Европа Лигаси 1/16 финал босқичи жавоб учрашувида «Вольфсберг», Англия Премьер Лигасида (26-тур) эса «Бёрнли» дарвозасини ишғол (дубль) этди ва ўзи ҳақида билдирилаётган танқидларга жавоб қайтарди.

Аммо жароҳатлар билан овора бўлиш супер юлдузга айланиши кутилган футболчининг ҳаёт тарзига айланиб улгурди. Тўғри, ҳар бир футболчига ҳам Чемпионлар Лигасида ғалаба қозониш ва энг нуфузли мусобақа финалида 3 та гол уриш насиб этавермайди, аммо Гарет ўзи лойиқ бўлган чўққиларни забт этмаганлиги кундан кунга аниқлашиб бормоқда. Қуйида Гарет Бэйлнинг бутун фаолиятига назар ташланади ва унинг қай тарзда бу аҳволга тушиб қолгани ҳақида ҳикоя қилинади.

«Саутҳэмптон»

2006 йил 17 апрель куни 16 ёшли Гарет Бэйл «Саутҳэмптон» сафида ўзининг катта футболдаги дебют ўйинини ўтказади. Ёш футболчи Чемпионшип доирасида ўтказилган «Миллуолл»га қарши ўйинда чап қанот ҳимоячиси сифатида 90 дақиқа ҳаракат қилади. Кейинги мавсумда эса Бэйл «авлиёлар»нинг асосий ўйинчисига айланади. Уэльслик футболчи Чемпионшипнинг 38 учрашувида майдонга тушиб, ўз ҳисобига 5 та гол ва 11 та голли узатмани ёздириб қўяди.

«Тоттенҳэм»га ўтиш

«Саутҳэмптон» чемпионатда олтинчи ўринни эгаллайди. Премьер Лигага чиқиш учун плей-оффнинг ярим финал ўйинида эса «Дерби Каунти»га пенальтилар сериясида имкониятни бой бериб қўяди. Аммо бу Бэйлнинг «Тоттенҳэм»га (5 миллион фунт эвазига) ўтишига тўсқинлик қила олмайди. Гарет янги клубида ҳам бирданига ёрқин ўйинлар кўрсата бошлайди, аммо шу орада жароҳат олиб сафдан чиқади.

Бэйл жароҳатидан тезда фориғ бўлади, аммо унинг ўз формасини тиклаб олиши қийин кечади ва «шпорлар»нинг асосий таркибига кира олмайди. Кейинги мавсум ҳам футболчи учун қийинроқ кечади, чунки Бэйл тиззасидаги операция туфайли мавсумолди тайёргарлик жараёнлари ва чемпионат стартини ўтказиб юборади. Уэльслик футболчи фақат январь ойига келибгина, мунтазам равишда ўйнай бошлайди. Чап қанот ҳимояси ва ярим ҳимояда ўйнаган Бэйл мавсум охирига келиб гол+пас тизими бўйича 8 очко (3+5) қайд этади.

2010/11 йилги биринчилик эса Гаретнинг «Тоттенҳэм»даги дастлабки ёрқин мавсуми бўлади, чап қанот ярим ҳимоясига ўтган футболчи 11 та гол уради ва 11 та голли узатмани амалга оширади. Чемпионлар Лигасидаги «Интер»га қарши ўйиндаги ҳет-трикдан сўнг унга кимсан «Реал»нинг ўша пайтдаги бош мураббийи Жозе Моуриньо қизиқаётгани ҳақидаги хабарлар пайдо бўлади. Гаретнинг бразилиялик жамоадоши Эурелио Гомеш эса уни техник томондан ватандошлари билан таққослайди:

«Гаретнинг ўйинида Бразилия ноталари бор. Ўйлашимча, у шунчалик яхши ўйнайдики, Бразилия терма жамоасида ҳам ўйнаши мумкин эди».

2011/12 йилги мавсумда Бэйлнинг кўрсаткичлари кўтарилади, «Барса» ва «Реал» скаутлари уэлслик футболчини диққат билан кузатишни бошлайди ва бунда каталонияликларнинг имкониятлари юқори баҳоланади. Мавсум охирига келиб, Гаретнинг ўзи ҳам испан грандларининг таклифидан фақат мамнун бўлишини тан олади. Кейинги мавсум эса Гарет учун том маънода энг омадлиси бўлади, у Андре Виллаш-Боаш бошчилигида ўз имкониятларини тўлиқ намойиш этади ва «шпорлар»нинг етакчисига айланади. Буни унинг 25 та голи ва 15 та голли узатмаси ҳам тасдиқлаб турибди. Ўша пайтда собиқ футболчи Майкл Доусон Гарет ҳақида шундай деганди:

«У ўз имкониятлари билан Роналду ва Мессига тенглаша олади. Гарет дунёнинг энг яхши футболчиларидан биридир. Эҳтимол, Бэйл ҳозир дунёнинг энг яхши футболчиси бўлиши ҳам мумкин. Бэйлнинг баъзи ақл бовар қилмас ҳаракатлари Криштиануни ҳам қизартириб юбориши мумкин».

«Реал»га ўтиш

2013 йилнинг ёзги трансферлар ойнасидаги узоқ ва қийин музокаралардан сўнг Гарет Бэйл ўша пайтдаги рекорд сумма — 101 миллион евро эвазига «Реал»га кўчиб ўтади. Уэльслик футболчи ўзига халақит берган кичик жароҳатларни инобатга олмаганда, Мадриддаги дебют мавсумини анча муваффақиятли ўтказади. У ўзининг «қаймоқранглилар» сафидаги дастлабки голини дебют учрашувидаёқ уради. 44 беллашувда майдонга тушган Гарет мавсум сўнгига келиб, 22 та гол ва 19 та ассистни амалга оширади. Испания Кубоги финалида «Барселона», Чемпионлар Лигаси ҳал қилувчи ўйинида эса «Атлетико» дарвозасига ғалаба тўпларини киритади. Жамоанинг ўша пайтдаги бош мураббийи Карло Анчелотти Бэйлдан мамнун эканлигини ва унинг бундан ҳам яхшироқ ишлаши мумкинлигини таъкидлайди.

Гарет Бэйл янги мавсум бошланишида олдин Криштиану Роналдунинг истеҳзоли табассумига сабаб бўлган бир фикрни билдиради:

«Жорий мавсумда мен «Олтин тўп»ни қўлга киритмоқчиман, шунингдек, «Реал» билан барча турнирларда ғолиб чиқишни истаган бўлардим. Мен «қироллик клуби» дунёнинг энг яхши жамоаси бўлишини хоҳлайман».

2014/15 йилги мавсумни Бэйл жамоанинг асосий юлдузларидан бири сифатида бошлайди, аммо «Реал» ушбу футбол йилида ҳеч қандай совринсиз қолади. Карло Анчелотти эса ўз вазифасидан озод этилади. Гарет ўтган мавсумдаги кўрсаткичларини яхшилай олмайди ва кўплаб учрашувларда жамоани орқага тортаётгандек таассурот уйғотади. Испания матбуоти уэлсликнинг Рамос ва Роналду билан ёмон муносабатларда эканлиги ҳақида ёзаётган бир пайтда, клуб раҳбарияти унга катта умид билдиришда давом этади. «Қаймоқранглилар» Рафаэл Бенитес бошчилигида мавсумнинг биринчи ярмини бой бериб қўйгач, жамоа бошқарувига Зидан келади ва Чемпионлар Лигасидаги ғалабани таъминлайди. Гарет «матрасчилар»га («Атлетико») қарши кечган Чемпионлар Лигаси финал ўйинида 120 дақиқа ҳаракат қилиб, Серхио Рамосга голли узатмани амалга оширади ва ўйиндан кейинги пенальтини аниқ ижро этади.

2016 йилнинг октябрь ойида Бэйл Мадрид клуби билан шартномасини 2022 йилгача узайтиргач, бир неча кундан сўнг сонини жароҳатлаб олади ва 4 ойга сафдан чиқади. Апрель ойига келиб эса Гарет Мадрид таркибидаги 100-ўйинини ўтказиб, юбилейини ҳам навбатдаги жароҳати билан «нишонлайди». Чемпионлар Лигаси финалида «Ювентус»га қарши баҳсда Гарет захирада қолади ва фақат 77-дақиқага келибгина майдонга тушади. Ва шунда ҳам Зидан унга ишонишда давом этади: «Бэйл майдонга тушганда «Реал» яхшироқ ўйнай бошлайди», — деганди француз.

2017/18 йилги мавсум — Гарет учун фаолиятидаги сўнгги муваффақиятли йил бўлади: барча мусобақаларда 21 та гол ва 7 та голли узатма. Шунингдек, Чемпионлар Лигаси финалида «Ливерпуль» дарвозасини ажойиб тарзда ишғол қилади. Аммо Бэйл шу мавсумнинг ўзида сезиларли даражада пастга шўнғийди. Зидан унинг ўрнига кўпроқ Иско ва Асенсиога ишонч билдиради ва мавсум охирида ундан қутулишни кўзлайди. Аммо шу вақтда Зидан ва Роналду «қироллик клуби»ни тарк этиши ҳақида эълон қилади. Шу тариқа Бэйл Мадриднинг асосий юлдузига айланиб қолади. Аммо «Реал» сингари у ҳам ўша мавсумда ўзига юклатилган вазифасини бажара олмайди. Зиданнинг ўрнига келган Хулен Лопетеги ишдан бўшатилгач, Сантьяго Солари бошқарувни ўз қўлига олади, аммо унинг саргузаштлари ҳам ҳеч қанча давом этмайди. Зидан ўз вазифасига қайтганидан кейин эса Гарет унинг режаларига кирмаслигини аниқ қилиб айтади. Бэйл майдонга чиққанда эса мухлислар уни ҳуштаклар билан кутиб оларди. Бэйлнинг агенти Зиданни «унинг кетиши ҳамма учун яхши бўлади» деган гаплари учун унчалик яхши бўлмаган сўзлар билан «сийлаганди». Муносабатлар қайта тикланмаслиги аниқ эди, аммо Гарет барибир даромадли шартнома билан Мадридда қолишга қарор қилади.

2019/20 йилги мавсумда Зидан Бэйлга ишонишга ваъда берди, аммо Гарет бу йилда ўзини тўлалигича голфга бағишлади. Ўзига берилган имкониятлардан эса умуман фойдаланмади — 20 та ўйин, бор-йўғи 3 та гол ва 2 та голли узатма. Ушбу мавсумда у кўпроқ захира ўриндиғидаги хурмача қилиқлари билан ёдда қолди. Бу «Олтин тўп»ни ютмоқчи бўлган 100 миллион евролик футболчининг «қироллик клуби»даги натижалари эди.

«Тоттенҳэм»га қайтиш (ижара)

Зидан билан тамомила муносабатлари бузилган ва «Реал»да бегона бўлиб қолган Бэйлнинг Лондонга қайтиш орқали фаолиятини қайта тиклаши кутилганди. Аммо бу ерда ҳам у умидларнинг ҳеч бирини оқламади (сўнгги 2 та ўйинни инобатга олмаганда, албатта). Жароҳатлар яна панд бера бошлади, бунинг устига Бэйлнинг ўзи ҳам тишини тишига қўйиб, тақдири учун курашадиган инсон эмаслиги кўриниб қолди. Унинг «Тоттенҳэм»да ўйнаб кетиши ҳам сўроқ остида турибди, боиси Моуриньонинг (ҳам) ундан ҳафсаласи пир бўлгани айтилмоқда.