Англиянинг “Кристал Пэлас” жамоаси 75 ёшли мураббий Рой Ҳожсон билан шартномани узайтирди. Ҳожсон ҳозирда фаолиятини олиб бораётган энг ёши катта мураббийлардан бири.
Лекин Рой ягона суперфахрий эмас.
Луческу — энг ёши катта мураббий
Биринчи ўринда 77 ёшли Мирча Луческу. У шартнома бўйича Киевнинг “Динамо” жамоаси мураббийи, бироқ сўнгги вақтларда касаллиги сабаб, операция бўлгач, унинг ўрнини ёрдамчиси Александр Шовковский эгаллаб турибди.
Кейинги ўринда Рой Ҳожсон. Март ойида англиялик мутахассис “Кристал Пэлас” бошқарувига ўтди ва клубни қуйи лигага тушиб кетишдан қутқариб қолди. Мавсум якунлангач, клуб мураббий билан шартномани узайтирди. Қизиқ маълумот: Ҳожсон “Реал”нинг “Сантиаго Бернабеу” стадионидан 127 кунга катта.
Ҳожсондан ташқари топ-лигаларда яна икки мураббий ишлайди: Клаудио Ранери (“Кальяри”ни А Серияга олиб чиқди) ва Ласло Болони (“Метц” билан бирга Лига 1 га чиқди). Шунингдек, Шенол Гюнеш ҳам бор: мутахассис “Бешиктош” билан Туркия чемпионатида учинчи ўринни эгаллади ва ЕЧЛ саралаш босқичи йўлланмасини қўлга киритди.
Уч нафар ёши катта мураббийлар терма жамоалар бошқарувида. Карлуш Кейруш Қатарда бўлиб ўтган мундиалдан сўнг Қатарни қабул қилиб олди. Гернот Рор Бенин терма жамоасини икки йилдан буён бошқариб келмоқда. Оге Ҳарейде апрель ойида Исландия терма жамоаси таклифини қабул қилди. Унга 74 ёшли Ларс Лагербек ёрдамчи бўлади.
Ҳозирда ишсиз бўлиб турганлардан “Лацио” собиқ мураббийи Эдоардо Рейя, барча Португалия топлари билан ишлаган Жезуалду Феррейра, уругвайлик Оскар Табаресларни ажратиб кўрсатиш мумкин. Агар улар ҳозир ҳам ишлаганида, Ҳожсондан юқорида турарди.
АПЛда нима гап?
Рой биринчи ўринда экан. Ундан кейингилар ким?
Иккинчи ўриндан Девид Мойес жой олган. 60 ёшли мутахассис яқинда “Вест Ҳэм” билан бирга Конференциялар Лигаси ғолибига айланди. Бу мураббий учун фаолиятидаги иккинчи соврин бўлди. “Бунга ишонгим келмайди. Унчалик қари эмасман. Ўзимни жуда яхши ҳис қиляпман. Балки, футбол ёшлар учундир, бироқ, тажрибали мураббийларга доим жой топилган”, — дейди Мойес.
“Тоттенҳэм”нинг янги мураббийи Энжу Постекоглу 57 ёшда. Ундан кейинг ўринда “Вулверҳэмптон” мураббийи Хулен Лопетеги ва Юрген Клопп бормоқда. Иккала мутахассис ҳам 56 ёшда. Немис “Ливерпуль”ни 8 йилдан буён бошқармоқда.
Лиганинг энг ёш мураббийи — Венсан Компани. У “Бёрнли”ни АПЛга олиб чиққанда 37 ёш 2 ой ва 25 кунлик эди.
Дунёдаги энг ёши катта мураббий 87 ёшда
Танишинг, бу Ларри Барилли. У ҳеч қачон профессионал даражада ишламаган, лекин Шотландия ҳаваскор футбол ассоциацияси Ларрининг 2000 дан ортиқ ўйин ўтказганини тасдиқлайди.
У 70 йилдан буён мураббийлик қилади. Шу вақт давомида Гринок шаҳрининг еттита жамоаси билан ишлашга муваффақ бўлган. Фақатгина 7 та ўйиннигина касаллик сабаб ўтказиб юборган. Барилли 1953 йилдан буён ишлаб келмоқда.
2019 йил сентябрь ойида Барилли Шотландия футбол ассоциацияси томонидан футбол ривожига қўшган ҳиссаси учун мукофотланган.
Изоҳ (0)