Бюджетдан нафақа ва иш ҳақига тўловлар камайиб, давлат қарзи фоизлари ва бошқарув чиқимлари кўпайтирилди

Иқтисодиёт ва молия вазирлиги 2025 йил 1-чораги бўйича бюджет ижроси тўғрисида маълумот берди.

Ойлик ва нафақадан пул тежалиб, бошқа чиқимлар оширилган

Январь март ойларида консолидациялашган давлат бюджети даромадлари 97,2 трлн сўмни, харажатлари эса 113,8 трлн сўмни ташкил этди. Бюджет тақчиллиги — 16,6 трлн сўм. Таққослаш учун, 2024 йил мос даврида тушумлар 75,6 трлн сўм, чиқимлар 98 трлн сўм бўлган.

Дастлабки чоракда давлат ходимлари иш ҳақи ва унга тенглаштирилган тўловларга учун бюджетдан 36,3 трлн сўм тўланган. 2024 йил 1-чорагида эса бу рақам 36,8 трлн сўм ажратилганди. Йиллик қисқариш — 500 млрд сўм.

Январь март ойларида ижтимоий харажатларга 39,9 трлн сўм (2024 йил I чоракда 33,9 трлн сўм), иқтисодиётга 10,4 трлн сўм (ўтган йил мос даврида 13,5 трлн сўм) сарфланган.

Давлат бошқарувига харажатлар ўтган йил мос давридагидан 700 млрд сўмга кўпайтирилиб, жами 4,5 трлн сўм ажратилган.

Давлат қарзининг фоиз тўловларига харажатлар бир йил аввалгига қараганда 800 млрд сўмга ортган ва 3,3 трлн сўм йўналтирилган.

Ижтимоий соҳа таркибида таълимга 18,5 трлн сўм, соғлиқни сақлашга 9,3 трлн сўм, пенсияларга 5,3 трлн сўм йўналтирилган.

Уч ой давомида нафақалар, моддий ёрдам ва компенсация тўловларига харажатлар қарийб 1 трлн сўмга қисқартирилган. Яъни 3,3 трлн сўм ажратилган (2024 йил мос даврида 4,3 трлн сўм).

Ҳудудлар бюджети

Январь март ойларида маҳаллий бюджет даромадлари 15,7 трлн сўм (2024 йил I чоракда 12,9 трлн сўм), харажатлари 22,2 трлн сўм (ўтган йил мос даврида 18,4 трлн сўм) бўлди. Бунда жорий йил ҳисобот давридаги маҳаллий баюджет тақчиллиги 6,5 трлн сўмни ташкил этган. Ўтган йил уч ойлигида эса бу кўрсатки 5,5 трлн сўм бўлган.

Умуман олганда, жорий йил I чоракда Ўзбекистоннинг бирорта ҳудуди даромадлари харажатларидан кўп бўлмаган. Тушум ва чиқимлари ўртасидаги энг йирик тақчиллик Фарғона вилоятида кузатилган — 828 млрд сўм. Энг кам дефицит Навоий вилоятида қайд этилган — 94,8 млрд сўм.

Субсидиялар

Дастлабки ҳисоб-китобларга кўра, I чоракда бюджетдан 8 трлн сўмлик субсидиялар ажратилган. Шундан 5,4 трлн сўми энергетикага йўналтирилган. Хусуан, табиий газ сотувидан кўрилган зарарни қоплашга 4,4 трлн сўм субсидия берилган (ўтган йил мос даврида 8 трлн сўм).

Жорий йилнинг илк уч ойида бюджетдан иссиқлик таъминоти корхоналари кўрган зарарни қоплашга 985 млрд сўм субсидия тўланган.

Шу билдан бирга, нодавлат боғчалар (895 млрд сўм), аҳолини уй-жой билан таъминлаш (398,5 млрд сўм) ва автобусда йўловчиларни ташишни молиялаштиришга (302 млрд сўм) қолган тармоқларга нисбатан кўпроқ субсидиялар берилган.