Буюк Британия об-ҳавони башорат қилувчи дунёдаги энг катта суперкомпьютер қуришни мўлжалламоқда. Қурилманинг ҳисоблаш қуввати фақатгина метеорология соҳасида фойдаланилади. Бу ҳақда New Scientist хабар бермоқда.
Cray XC40 компьютери қарийб 140 тонна оғирликка эга бўлади. Бу тахминан 11 та Лондон автобусининг биргаликдаги оғирлигига тенг кўрсаткичдир. Об-ҳавони башорат қилувчи қурилма Англия жануби-ғарбидаги Эксетер графлигига жойлаштирилади.
Лойиҳанинг қиймати 97 миллион фунт стерлинг (тақрибан 156,2 миллион доллар)га баҳоланмоқда. Компьютер ҳосилдорлиги 16 петафлопсга тенг бўлади. Таққослаш учун, iPhone 6 смартфонидаги Apple А8 процессори тақрибан бир гигафлопс ҳосилдорликка эгадир.
Cray XC40 об-ҳавони келгуси 5—6 кун учун башорат қилади. Қурилма прогноз қилишдан ташқари, катта кўламли тадқиқотларни ҳам олиб боради. Хусусан, иқлим ўзгаришларида одамзотнинг роли ҳамда иссиқхона эффектини ўрганиш суперкомпьютерга юклатиладиган вазифалардан ҳисобланади.
Изоҳ (0)