“Аввал ҳам газдан заҳарланиш ҳолатлари кузатилган” — ФВВ Бойсундаги газ кони бўйича изоҳ берди

Бугун, 19 май куни АОКАда бўлиб ўтган матбуот анжуманида Фавқулодда вазиятлар вазирлиги анчадан буён портлашлар юз бераётган Бойсундаги “Мустақилликнинг 25 йиллиги” конидаги ҳолат юзасидан изоҳ берди.

Анжуманда журналистлар томонидан Бойсундаги газ конида ҳали ҳам газ портлашлари юз бераётгани ва ҳолат шу зайлда давом этса аҳолини эвакуация қилиш режа қилинганми, деган савол берилди. ФВВ ахборот хизмати раҳбари ўринбосари Самандар Ҳикматуллаевнинг жавоб беришича, Бойсунда қадимдан газ сизиб чиқиши ва бундан одамларни заҳарланиш ҳолатлари кузатилган.

Газ иккита қатлам орасида пайдо бўлади. Ўша икки қатлам орасида жуда кўп йиллар давомида газ конлари пайдо бўлади. Бойсун тоғолди ҳудуд ҳисобланади. Қадимдан бу жойларда газ сизиб чиққан ва заҳарланиш бўлган. Газ сизиб чиқишини аҳоли олдин ҳам билган, деди Самандар Ҳикматуллаев.

Унинг айтишича, вазирликда Бойсунда рўй бераётган ҳодиса юзасидан охирги маълумот йўқ.

Бурғилаш кучли бўлгани учун қатламлар орасидаги газ юқори босимда чиқиб кетишни бошлаган. Айни кунларда чиқаётган газ ёқиб қўйилган. Бундан мақсад атроф-муҳитни турли зарарли газлардан муҳофаза қилиш. Ёниб кетганидан кейин у ерда газ тўпланиб қолмайди ва бу аҳолига таъсир қилмайди.

Ҳозир бу ерда муҳандислик-техник тадбирлар амалга оширилмоқда. Махсус ташкилотлар чиқаётган газни жиловлаш ишларини олиб бормоқда. Ҳозир қўлимда аниқ маълумотлар йўқ. ERIELL деган ташкилот бурғилаш ишларини олиб бормоқда, асосий маълумотлар уларда, деди ФВВ вакили.

Эслатиб ўтамиз, Сурхондарё вилоятининг Бойсун туманидаги “Мустақилликнинг 25 йиллиги” конида 5 май куни, 27 март куни отилиб чиққан газ ёқиб қўйилган. 22 апрель куни қудуқ ўқининг ғовланиб тушгани ва колонна чиқиб кетиши натижасида фонтанланиш тўхтаган, ҳодиса жойида газнинг суст оқими (грифон) кузатилган.

Бойсун конидаги авария

• 2024 йил 1 сентябрь куни соат 15:17 да Сурхондарё вилояти Бойсун тумани “Кўлқамиш” МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилган.
• Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинган. Президент топшириғига асосан бош вазир ўринбосари Очилбой Раматов, фавқулодда вазиятлар вазири Абдулла Қўлдошев, энергетика вазири Жўрабек Мирзамаҳмудов, Сурхондарё вилояти ҳокими Улуғбек Қосимов ҳамда “Ўзбекнефтгаз” бошқарув раиси Баҳодир Сиддиқов ҳодиса жойига етиб борган.
• 15 сентябрь куни соат 16:50 да сизиб чиқиш тўхтатилган. Аммо мазкур конда 17 сентябрь куни яна газ чиқиш ҳолати юз берган. Янги авария оқибатида тўрт киши ҳалок бўлган.