Бирлашган Миллатлар Ташкилоти Хавфсизлик кенгаши 8 март куни Суданда мусулмонлар учун муқаддас рамазон ойи келиши муносабати билан ҳарбий ҳаракатларни зудлик билан тўхтатишни талаб қилувчи резолюция лойиҳасини қабул қилди. Бу ҳақда Anadolu нашри хабар берди.
Буюк Британия томонидан тақдим этилган резолюция БМТ Хавфсизлик кенгаши сессиясида овозга қўйилган. Резолюцияга 15 аъзодан иборат кенгашнинг 14 вакили овоз берган.
Резолюция Суданда рамазон ойи давомида жанговар ҳаракатларни зудлик билан тўхтатишни талаб қилади. Мулоқот йўли билан ечим топишга қаратилган саъй-ҳаракатларни рағбатлантиради.
Ҳозирда Судан ҳукмрон Суверен кенгаш раҳбари генерал Абдул Фаттоҳ ал-Бурхон бошчилигидаги армия ва ҳарбийлаштирилган тезкор қўллаб-қувватлаш кучлари ўртасидаги жанглар гирдобида қолиб кетган. Апрель ойида бошланган можарода камида 12 260 нафар киши ҳалок бўлган ва 33 мингдан ортиқ киши жароҳатланган.
Мамлакат айни дамда гуманитар ҳалокат ёқасида. 6 миллионга яқин маҳаллий аҳоли вакиллари ўз турар жойларини тарк этган. Халқаро ҳамжамиятнинг қатъий талаблари ҳам бу урушни тўхтатишда амалий аҳамият касб эта олмади.
Изоҳ (0)