Суданда бир ёшга тўлмаган болаларни ҳам зўрлаш ҳолатлари учрамоқда — БМТ

Судандаги фуқаролар уруши пайтида қуролланган одамлар бир ёшга тўлмаган болаларга ҳам жинсий тажовуз қилган. Бу ҳақда Бирлашган Миллатлар Ташкилотига таяниб BBC хабар берди.

Оммавий жинсий зўравонлик мамлакатда деярли икки йил давом этиб келаётган можароларда оммавий тус олган. ЮНИСЕФ ҳисоботига кўра, қурбонларнинг учдан бири ўғил болалар бўлиб, уларнинг ота-оналари айнан шунинг учун бу ҳақда тегишли жойга арз қилишга кўпинча ботина олишмайди.

2024 йил бошидан бери болаларга нисбатан 221 та зўрлаш ҳолатлари расман қайд этилган, бироқ ҳақиқий рақам бундан анча юқори бўлиши мумкин.

ЮНИСЕФ ҳисоботи эса бу борада олиб борилган илк тадқиқот ҳисобланади. Энг ҳайратланарли жиҳат шундаки, қурбонларнинг 16 нафари беш ёшгача бўлган, шу жумладан, тўрттаси чақалоқ эди.
Ҳисоботда ким айбдорлиги ҳақида аниқ маълумот йўқ, бироқ БМТнинг бошқа терговларида зўрлашларнинг аксариятида маҳаллий ҳарбийларнинг қўли борлиги очиқланади. 

Суданда ҳужжатлаштирилган жинсий зўравонликнинг катта миқёсда экани ҳайратланарли, деди БМТнинг фактларни аниқлаш миссияси раҳбари Муҳаммад Чанде.

БМТ Суданга ҳеч қандай гуманитар ёрдамни молиялаштирмаган. Бундан ташқари, яқинда АҚШнинг ёрдами ҳам қисқартирилиши маълум қилинди. Бу аҳволнинг янада чигаллашишига сабаб бўлади. 

Кечаси тўққиздан кейин кимдир эшикни очади, қамчи кўтариб, қизлардан бирини танлайди ва уни бошқа хонага олиб боради. Мен қизимнинг йиғлаётганини ва қичқирганини эшитдим, деб эслайди Омниа (исми ўзгартирилган), омон қолган катта ёшли аёл. 

Таъкидланишича, бундан ташқари бир нечта аёл ва қизлар бир хонада қуролланган эркаклар томонидан ушлаб турилади.

Мамлакатда фуқаролар уруши сабаб эвакуация қилинганларнинг кўп қисмини аёллар ва болалар ташкил қилади. Ҳар уч қиздан иккиси мактабга бора олмайди. Соғлиқни сақлаш тизими ҳам танг аҳволда. Можаролар сабаб кўплаб тиббиёт муассасалари вайрон қилинган ёки уришаётган томонлар томонидан эгаллаб олинган.