Судан жануби-шарқида давом этаётган қуролли ҳаракатлар оқибатида 136 мингдан ортиқ фуқаро турар жойларини ташлаб кетган. Бу ҳақда мамлакат маҳаллий манбаларига таяниб, Arab News нашри хабар берди.
Аҳолининг оммавий кўчиши Сеннар штатида юз берган. Қуролли гуруҳларнинг тинч аҳолига ҳужумлари кўпайиши ортидан фуқаролар бутун штат ҳудудини тарк эта бошлаган.
Сўнгги ҳафтада Сеннар штатига ҳарбийлаштирилган Тезкор қўллаб-қувватлаш кучлари гуруҳи ҳужумлари кучайган. Вилоятни қўриқлаб турган миллий армия қисмлари ғарбга чекинган.
Тезкор қўллаб-қувватлаш кучларининг Сеннар штатига ҳужуми 24 июнь куни бошланган. Аскарлар ҳудуд марказий шаҳрини ишғол қилишга уринишган. Режа амалга ошмагач, штат жанубидаги Синжа ва Ал-Диндер ҳудудларига зарба бериш бошланган.
Сеннардан қочган 136 минг аҳоли ҳозирда Кўк Нил ва Ал-Герадеф штатларида тўпланган. Мамлакатдаги тартибсизлик ҳамда оғир ижтимоий вазият туфайли уларга ҳукумат ёрдамини кўрсатиш имконсиз.
Суданнинг кўплаб расмийлари Тезкор қўллаб-қувватлаш кучларини босиб олинган ҳудудларда “этник тозалаш” ўтказишда айблаган. БМТ вакиллик муассасалари ҳам қуролли гуруҳдан ҳарбий ҳаракатларни зудлик билан тўхтатишни сўраган.
Суданда икки ҳарбий тузилма ўртасида кескинлик бошланганидан бери ўз ҳудудларини ташлаб кетган фуқаролар сони 10 миллионга етган. Энг йирик жанглар Шимолий Дарфур штатидаги Ал-Фашир шаҳрида кузатилган. Халқаро ташкилотларнинг бир қанча қатъий резолюцияларига қарамай Суданда уруш давом этмоқда.
Изоҳ (0)