УЕФА Чемпионлар Лигаси чорак финал босқичи жавоб баҳслари доирасидаги сўнгги икки учрашув бўлиб ўтди. “Реал” Мадридда “Арсенал”га қарши баҳс олиб борган бўлса, “Интер” Миланда “Бавария”ни синовдан ўтказди.
Италияда кечган баҳсда мухлислар 4 та гол гувоҳига айланишди. Учрашувдаги ҳисоб 52-дақиқада меҳмонлар ҳужумчиси Ҳарри Кейн томонидан очилди. 58-дақиқада Лаутаро Мартинес таблодаги натижани тенглаштирди. Орадан 3 дақиқа ўтиб, миланликлар ҳисобда олдинга чиқиб олди. Гол муаллифи — Бенжамин Павар. 76-дақиқада Мюнхен клуби Эрик Дайернинг голи эвазига яна ҳисобни тенглаштирди.
Учрашувнинг қолган вақтлари ҳам қизғин курашларга бой ўтди, лекин дарвозаларга бошқа тўп киритилмади. Икки ўйин натижасига кўра 4:3 ҳисобида ғалаба қозонган “Интер” ярим финал йўлланмасига эга чиқди. “Бавария” эса мусобақа билан хайрлашди.
Мадриддаги баҳсда кўплаб мухлислар кутганидек камбек бўлмади. Лондон клуби ўйиннинг дастлабки дақиқаларидан анча ишончли ҳаракат қилди. Учрашувнинг илк бўлимида дарвозаларга гол киритилмади.
Иккинчи таймнинг 65-дақиқасида “Арсенал” ҳисобда олдинга чиқиб олди. Букайо Сака ўзи бошлаган ҳужумни гол билан якунлаб, Тибо Куртуа дарвозасини ишғол қилди.
Орадан икки дақиқа ўтиб, “канонирлар” ҳимоячиси Вильям Салиба қўпол хатога йўл қўйди. Футболчи дарвозасига яқин жойда тўпни Винисиусга олдириб қўйди ва “Реал”нинг бразилялик футболчиси вазиятдан унумли фойдаланиб, Лондон клуби дарвозасини ишғол қилди. Учрашув 1:1 ҳисобида тугашга яқин турган эди, лекин 90+3-дақиқада тезкор қарши ҳужум уюштирган Микель Артета жамоаси “қироллик клуби”ни яна жазолади. Габриэль Мартинелли жамосининг ўйиндаги иккинчи голини киритиб, “Арсенал” жавоб учрашувида ҳам ғалаба қозонишида ёрдам берди.
Шу тариқа Мадриддаги баҳс 2:1 ҳисобида Лондон клуби фойдасига ҳал бўлди. “Арсенал” икки ўйин натижасига кўра, 5:1 ҳисобида ғалаба қозониб, кейинги босқич масаласини ҳал қилди. “Реал” мусобақани шу босқичда якунлашга мажбур бўлди.
ЕЧЛ
Чорак финал, жавоб баҳслари
16 апрель, чоршанба
“Интер” — “Бавария” 2:2 (умумий ҳисоб — 4:3)
Голлар: 0:1 — Ҳарри Кейн (52), 1:1 — Мартинес (58), 2:1 — Павар, 2:2 — Дайер (76).
“Реал Мадрид” — “Арсенал” 1:2 (умумий ҳисоб — 1:5)
Голлар: 0:1 — Сака (65), 1:1 — Винисиус (67), 1:2 — Мартинелли (90+3)
Изоҳ (0)