Тиаго Алькантара уч мамлакат терма жамоасида ўйнаши мумкин эди, бироқ у Испанияни танлади. Тиаго «Барселона» академиясида тарбияланди, аммо «Бавария» юлдуз мақомига эришди. Яқинда эса уни Туманли Альбионнинг эса шонли жамоаларидан бири — «Ливерпуль» ўз сафига қўшиб олди. Ҳеч шубҳа йўқки, у Мерсисайд клуби сафида ҳам катта ютуқларга эришади. Демак, қуйида «Ливерпуль»нинг янги маэстроси Тиаго Алькантара ҳақида фикр юритилади.
Туғилганидаёқ футболчи бўлиши аниқ эди
Тиагони қўлида тўп билан туғилган деб аташ мумкин, унинг ҳаёти спорт, хусусан, футбол билан боғлиқ бўлган, боиси Тиагонинг отаси афсонавий бразилиялик футболчи, 1994 йилги Жаҳон чемпиони Иомар до Насименто (Мазинё), онаси эса ўз вақтида машҳур волейболчи бўлган. Ушбу ҳолатда Тиаго ўзини бошқа соҳада тасаввур ҳам қила олмаган.
Кўп маданиятли одам
Тиаго — турли маданиятларга яқин инсон ҳисобланади. Унинг отаси таниқли футболчи бўлганлиги учун оила доимий равишда бир жойдан иккинчи жойга кўчиб юрарди. Италияда туғилган Тиаго бутун дунёни кезиб чиққан. У футбол билан шуғулланишни Рио-де-Жанейрода, «Фламенго»академиясида бошлайди. Кейин эса Испанияга кўчиб ўтади: 2005 йилда 14 ёшида «Барселона» академиясида пайдо бўлади.
Миллий терма жамоа даражасида Тиаго Италия ёки Бразилия шарафини ҳам ҳимоя қилиши мумкин эди, аммо у отасининг ғазабига қарамай, Испанияни танлайди. У бу танловини қуйидагича тушунтиради: «Мен Испанияда катта бўлганман. Яна нима ҳам дейиш мумкин?»
Балотеллидан мақтов
Марио Балотеллининг «Барселона» академиясига тушиб қолгани мумкинлиги ҳақида кўпчилик эшитмаган бўлса керак. 2006 йилда жанжалкаш италян Каталонияда кўрикда бўлади ва Тиаго билан дўстлашиб қолади. Гарчи Супер Марио Ла Масияга («Барселона» академияси) кира олмаган бўлса ҳам, дўстини унутмади: Тиагонинг терма жамоадаги дебют ўйинидан сўнг (Италия қарши кечган) журналистлар уни қуршаб олган вақтда суҳбатга тўсатдан чақирилмаган Марио аралашиб, бутун дунёга дўстининг «эл мас гранде» (энг зўри) экани ҳақида жар солади. Маълумки, Балотелли кимнидир мақташи жуда ноёб ҳолат.
Ла Масияда «ишлаб чиқарилган»
Тиаго билан алоқани сақлаб қолгани аниқ бўлган яна бир таниқли «Барселона»чи — бу унинг укаси Рафиньядир. «Ливерпуль» футболчисидан фарқли ўлароқ, Рафинья Бразилия терма жамоаси шарафини ҳимоя қилишни маъқул кўрган. Жаҳон Чемпионатлари вақтида уларнинг онаси аҳволини тасаввур қилаверинг.
Эсда қоларли биринчи гол
Тиаго «Бавария» таркибидаги илк голини 2013 йилги клублар ўртасидаги Жаҳон чемпионати финалида марокашнинг «Рабат Касабланка» дарвозасига уради. Унинг ёрдами билан жамоа 2:0 ҳисобида ғалаба қозонади ва «Бавария» Пепнинг қўл остида олти ой ичида иккинчи совринини қўлга киритади.
Исталган мураббийнинг орзуси
Гвардиола ўзининг кейинги клуби сифатида «Манчестер Сити»ни танлаганига қарамай, Тиаго жамоасини ўзгартиришга шошилмади. Бундан ташқари, Карло Анчелотти бошчилигида у фаолиятидаги энг яхши мавсумини ўтказади ва олдинги мавсумга қараганда деярли икки баравар кўп ўйин ўтказиб, олтита гол ҳамда бешта голли узатмага муаллифлик қилади.
«Бавария» собиқ бош мураббийи Нико Ковач Тиаго ҳақида шундай деганди: «Тиаго ҳақида нима дея оламан? У ҳар қандай мураббийнинг орзуси. Бизда кучли ярим ҳимоячиларнинг ажойиб тўплами бор, аммо у бутун жамоанинг юраги, тўп билан исталган нарсани амалга ошира олади».
«Технар»
Маълумки, Тиаго ўзининг ақл бовар қилмас техникаси ва ажойиб паслари билан яхши танилган. Шунингдек, у узатмаларнинг ҳам ҳақиқий устаси ҳисобланади ва буни статистика ҳам тасдиқлайди: сўнгги олти мавсумнинг ҳар бирида испаниялик футболчи камида 90 фоизлик аниқлик билан мақтана олади.
Қорбобонинг ёрдамчиси
Ҳатто буюклар ҳам хато қилиб туради. Бундеслига доирасида 2016 йил 21 декабрь куни ўтказилган «Лейпциг»га қарши ўйинда Тиаго майдон марказида тўпни эгаллаб олиб, ноаниқ узатма беради. Қизиқарли жиҳати шундаки, Тиаго ноаниқ пас берган вақтда реклама устунларида Санта Клауснинг тасвири пайдо бўлади.
Эртаси куни эса барча немис оммавий ахборот воситалари «Қорбобонинг янги ёрдамчиси ҳақида» сарлавҳали хабарлар билан тўлиб кетади.
Алькантара жамғармаси
Тиаго (акаси, отаси, онаси ва рафиқаси билан биргаликда) Алькантара оилавий жамғармасини ташкил этган, унинг вазифаси эса кам таъминланган оилаларнинг болаларига таълим олишда ёрдам беришдир. «Спорт ҳаётнинг турли хил жиҳатларига таъсир ўтказиши мумкин», — деб ҳисоблайди Тиаго.
Изоҳ (0)