Microsoft корпорацияси Windows11 фойдаланувчилари учун бир нечта янгиликларни тақдим этди. Бу ҳақда Neowin нашри хабар берди.
Хавфсизликка оид бўлмаган янгиланиш Windows 11 24H2 версияси фойдаланувчилари учун мавжуд. Янгиланишда сунъий интеллект (СИ) ва Copilot виртуал ёрдамчиси билан боғлиқ бир нечта функциялар қўшилган. Жумладан, операцион тизимга (ОТ) “инсон тилида” қидирув сўровини шакллантириш орқали ҳужжатларни топишга имкон берадиган ақлли қидирув киритилган.
Microsoft’нинг таъкидлашича, фойдаланувчилар файлларнинг номни ёки улар ўзгартирилган аниқ санани эслаб қолишлари шарт эмас. Қидирув функцияси махсус нейропроцессорли Copilot+ компьютерларида ишлайди. Ҳозирча у фақат Snapdragon чипи ўрнатилган қурилмаларда мавжуд. Қидирув қурилмаси интернетга уланмаган ҳолда ҳам ишлаши мумкин.
Шунингдек, операцион тизимга “Жонли субтитрлар” функцияси қўшилган, бу эса ҳар қандай видеога 44 тилда субтитр яратиш имконини беради. Snapdragon процессори асосидаги компьютерларда чет тилидаги нутқни турли тилларга, жумладан, рус тилига таржима қилиш имконияти пайдо бўлди.
Бундан ташқари Windows 11 да КB5053656 янгиланиши билан 40 га яқин хатолар бартараф этилди. Жумладан, “Вазифалар бошқарувчиси” носозликлари ва компьютер уйқу режимидан чиққандан сўнг БСоД критик хатосига дуч келиш муаммоси ҳал қилинди.
Март ойи охирида Microsoft Windows Roadmap — Windows операцион тизимининг янги функцияларини кузатиш учун сайтни ишга туширди. У орқали операцион тизимда синов босқичида мавжуд бўлган функцияларни ва уларнинг оммавий версияларда қачон пайдо бўлишини кўриш мумкин.
Изоҳ (0)