Raspberry Pi 400 тақдим этилди: клавиатурада жойлашган мини-компьютер

Raspberry компанияси кичик клавиатура ичидан ўрин олган биринчи универсал мини-компьютерни тақдим этди, деб хабар беради Hi-Tech.Mail.ru.

Интернет, ҳужжатлар билан ишлаш, дастурлашни ўргатиш ва бошқа вазифаларни бажариш имконини берадиган АRМ процессорига эга Raspberry Pi 400 кичкина компьютерга жойлаштирилди. Компьютер клавиатура корпусидан жой олган, унга фақатгина монитор уланса кифоя — бунинг учун корпусда иккита HDMI мавжуд.

Компьютернинг техник тавсифи ҳам ёмон эмас — 1,8 гигагерц максимал частота ва 4 гигабайт тезкор хотирага эга 4 ядроли Cоrtex-А72. Унга турли операцион тизимларни, жумладан, Windows 10’ни ҳам ўрнатиш мумкин. Шунингдек, ундан портлар жамланмаси ҳам ўрин олган — иккита USB 3.0, битта USB 2.0, microSD учун слот ва ҳатто LAN-порт. Яна Wi-Fi ва Bluetooth ҳам мавжуд.

Унга сичқонча ва исталган монитор ёки телевизорни улаб, тайёр компьютер сифатида фойдаланиш мумкин. Энг муҳим жиҳати, бу каби компьютер нархи 70 доллар атрофида.

Эслатиб ўтамиз, шу йилнинг апрель ойида Хитойнинг Chuwi компанияси катталиги олма ёки лимондек келадиган LarkBох номли мини-компьютерни тақдим этганди. Май охирларида сотувга чиқиши кутилган ушбу компьютер нархи 199 долларни ташкил этган.