Windows операцион тизимидаги носозлик ортидан айрим банклар, тўлов тизимлари ва асосан аэропортлар фаолиятида глобал узилиш кузатилмоқда. Бу ҳақда CNN хабар берди.
Испания, Германия, Австралия, Янги Зеландия аэропортлари, Туркиянинг Turkish Airlines, АҚШнинг American Airlines, United Airlines, Delta Airlines, Allegiant, Sun Country, Frontier каби қатор авиакомпаниялар рейсларини кечиктиришга мажбур бўлмоқда. Microsoft “носозликларни бартараф этиш бўйича чоралар кўраётганини”, хизматлар фаолияти аста-секин барқарорлашаётганини маълум қилди. Муаммолар Windows ва Microsoft компьютерларида ҳам қайд этилган.
“Бу муаммодан хабардормиз ва бир нечта жамоаларни жалб қилдик. Биз асосий сабабни аниқладик. Ҳозирда оқибатларни юмшатиш чораларини кўряпмиз. Мижозлар тикланиш белгиларини кўриши керак, чунки минтақадаги барча ресурсларга таъсирни юмшатиш бўйича чоралар қўлланилади”, — дейилади компания хабарида.
Microsoft Azure маълумотларни сақлаш платформасидаги носозлик туфайли Америка авиакомпанияларининг камида 130 та рейслари бекор қилинди ва 200 дан ортиқ рейслар кечиктирилди. Turkish Airlines авиакомпанияси чипталарни брон қилиш ва рейсларни рўйхатдан ўтказишда муаммоларга дуч келмоқда.
Изоҳ (0)