ХХ асрнинг иккинчи ярми том маънода иқтисодий инқилоблар асри бўлди. Кечагина ўз капиталини миллион долларга зўрға чиқарган компаниялар аср охирига ва XXI аср бошига келиб ўз маблағини миллиардлик рақамларда ҳисоблайдиган катта корпорацияларга айланди. Айниқса ХХ аср охири – XXI аср бошида очилган ахборот технологиялари ва интернет соҳасида турли мақсадларда очилган компаниялар бугун ўз айланма маблағини нафақат миллиард, балки триллионлик маррага яқинлаштиряпти. Мутахассисларнинг таҳлилларига кўра, яқин 1–2 йилда дунёнинг бир нечта корпорацияси айланма маблағини триллионлик маррадан ўтказади.
Қуйида 2019 йил январь ойи ҳолатига кўра дунёнинг маблағи энг катта бўлган корпорация ва компаниялари ўнталиги келтирилади.
10. JP Morgan Chase
Бугунги кунда қиймати: 332,24 миллиард доллар
Соҳаси: Банк иши
Ушбу банк айланма маблағ миқдори бўйича АҚШда 1-ўринда, дунёда эса 6-ўринда туради. Бош офиси Нью-Йорк шаҳри, Манхэттен туманида, 270 Park Avenue’да жойлашган.
9. Johnson & Johnson
Бугунги кунда қиймати: 347,99 миллиард доллар
Соҳаси: фармацевтика
Ушбу компанияни 1886 йилда ака-ука Жонсонлар тузган. Бугунги кунда ушбу компания маҳсулотлари 60 давлатда ишлаб чиқарилади, 175 давлатда сотилади.
Бош офиси Нью-Жерси штати, Нью-Брансуик шаҳрида жойлашган.
8. Alibaba Group
Бугунги кунда қиймати: 392,25 миллиард доллар
Соҳаси: интернет, электрон савдо
Маҳсулотлари: электрон савдо, онлайн аукцион, онлайн таржималар, онлайн пул ўтказмалари, тезкор савдо
Alibaba компанияси Хитойда биринчи ўринда, дунёда эса юқори ўринлардан бирида турувчи электрон савдо платформаларидан бири ҳисобланади. У 1999 йил 4 апрелда тузилган. Бош офиси Хитойнинг Ханьчжоу шаҳрида.
7. Tencent
Бугунги кунда қиймати: 400,90 миллиард доллар
Соҳаси: ижтимоий тармоқлар, ОАВ, веб-порталлар
Компания бугун қуйидаги йўналишларда хизмат кўрсатиб бормоқда: ижтимоий тармоқлар, мобил ўйинлар, тўлов хизматлари, интернет-сервис, смартфонлар ишлаб чиқариш.
Компания Хитойда 1998 йилда очилган. Бош офиси Наншань шаҳрида.
6. Facebook
Ҳозирги кунда қиймати: 413,25 миллиард доллар
Соҳаси: ижтимоий тармоқ
Ижтимоий тармоқни 2004 йилда Марк Цукерберг очган. Бугунги кунда ижтимоий тармоққа бир кунда 1,86 миллиард одам киради.
Facebook биргина рекламанинг ўзидан йилига 8 миллиард доллар соф фойда олади.
Бош офиси Калифорния штати, Менло-Парк шаҳрида.
5. Berkshire Hathaway Inc.
Ҳозирги кунда қиймати: 482,36 миллиард доллар.
Компания кўп тармоқли ҳисобланади: суғурта, молия, темир йўл, коммунал хизматлар ва бошқа кўплаб соҳалар. Компания америкалик миллиадер Уоррен Баффетга тегишли.
Компаниянинг шўъба корхоналари рўйхати:
GEICO (автосуғурта);
General Re (олдиндан суғурта қилиш);
Berkshire Hathaway Primary Group (суғурта);
Berkshire Hathaway Reinsurance Group (суғурта ва олдиндан суғурта қилиш);
BNSF — (темирйўл транспорти);
Berkshire Hathaway Energy (электр ва газ таъминоти);
McLane Company (улгуржи савдо).
Бош офиси Небраска штати, Омаха шаҳрида.
4. Apple Inc.
Ҳозирги кундаги қиймати: 720,12 миллиард доллар
Соҳаси: электроника ва ахборот технологиялари, планшет, компьютер, мобил телефонлар ишлаб чиқариш.
Компанияни 1976 йилда Стив Жобс, Стив Возняк ва Рональд Уэйнлар ташкил этган. Бугунги кунда бу компанияда дунё бўйлаб 132 минг ходим ишлайди. Бош офиси Калифорния штати, Купертино шаҳрида.
Apple узоқ вақт дунёнинг энг қиммат компанияси бўлиб келди. Аммо охирги бир нечта телефон маркаларининг муваффақиятсиз чиқиши ва сармоядорларнинг ишончсиз муносабатлари компания акцияларининг нархини 30 фоизга арзонлаб кетишига сабаб бўлди. Шу тариқа, у энг қиммат компаниялар рўйхатидаги 1-ўрнини бошқаларга бўшатиб берди.
3. Alphabet Inc.
Ҳозирги кундаги қиймати: 737,37 миллиард доллар
Соҳаси: интернет хизматлари
Бу номи ўзгарган Google компаниясидир. Alphabet Inc. компанияси нафақат Google’га, балки AdWords, Android, YouTube каби ўттизга яқин таниқли брендларга ва компанияларга эгалик қилади.Компанияга 1998 йилда Сергей Брин ва Ларри Пейжлар асос солган.
Бош офиси Калифорния штатида жойлашган.
2. Microsoft
Ҳозирги кундаги қиймати: 789,25 миллиард доллар
Соҳаси: турли электрон дастурлар савдоси.
Microsoft бугун бозор қийматига кўра дунёнинг иккинчи энг қиммат компанияси ҳисобланади.
Асосий маҳсулотлари Microsoft Office, Windows ва Xbox бўлган ушбу компанияга 1975 йилда Билл Гейтс асос солган.
Бугунги кунда Microsoft дастурлар яратиш ва сотиш бўйича дунёнинг энг олд компанияси ҳисобланади. Унинг Windows дастури дунёдаги энг оммабоп дастурдир.
Штаб-квартираси Вашингтон штатидаги Редмонд шаҳрида жойлашган.
1. Amazon Inc.
Ҳозирги кундаги қиймати: 802,18 миллиард доллар
2019 йил 7 январь куни АҚШнинг яна бир компанияси — Amazon Microsoft’ни қувиб ўтиб, жаҳоннинг энг қиммат компаниясига айланди.
Amazon – бу нафақат АҚШ, балки бутун дунёда турли маҳсулотларни интернетда сотишга ихтисослашган энг йирик компания.
Amazon онлайн майдончаси ёрдамида интернет фойдаланувчилари, шунингдек, етказиб берувчилар, ишлаб чиқарувчилар исталган маҳсулотни сотиши ва сотиб олиши мумкин.
Компанияга 1994 йилда Жефф Безос томонидан асос солинган. Компания бош офиси Вашингтон штатининг Сиэтл шаҳрида жойлашган.
Компанияда бугунги кунда умумий ҳисобда 230 минг ходим ишлайди.
Изоҳ (0)