Тошкент шаҳри чорраҳаларига Швейцария компанияси томонидан ўрнатилган қоидабузарликларни қайд этувчи видеокузатув мосламаларининг лицензияси тугагани тўғрисида хабар берилганди. «Kun.uz»нинг ИИВ ЙҲХББ масъул ходимига таяниб ёзишича, камераларга лицензиялар муайян муддатга эмас, балки умрбод берилган.
Таъкидланишича, ИИВ Йўл ҳаракати хавфсизлиги бошқармаси бўлими бошлиғи подполковник Шуҳрат Муродов Алексей Хеннинг чорраҳаларга ўрнатилган видеокузатув мосламаларининг лицензияси тугагани ҳақидаги сўзларини рад этган.
«Йўл ҳаракати хавфсизлигини таъминлаш, содир этилиши мумкин бўлган кўнгилсиз ҳолатларнинг олдини олиш, қоидабузарликлар сонини камайтириш мақсадида Тошкент шаҳридаги кўчалар ва чорраҳаларга ўрнатилган видеокузатув камераларининг лицензияси тугамаган. Халқ депутатлари Тошкент шаҳар кенгашининг йигирма бешинчи сессиясининг видеосини мен ҳам кўрдим. Маърузачи сўзни нотўғри қўллаган, ҳозир қандай ускуна сотиб олсангиз, лицензия 1-2 йилгамас, умрбод берилади.
Айни пайтда қоидабузарликларни аниқловчи видеокузатув тизими модернизация қилинмоқда. Вақтида бу камераларни сотиб олганмиз, энди уларни ташлаб юбормаймиз-ку! Дейлик, уч йил олдин компьютер сотиб олгансиз. Ўшанда унга Windows 10 операцион тизими ўрнатилган. Орадан уч-тўрт йил ўтгач, уни ташлаб юбормайсиз-ку, тўғрими? Операцион тизимини янгилайсиз, қайта ўрнатасиз. Худди шундай камераларнинг ҳам дастурий таъминотини янгилаяпмиз.
Аслида, мен Рақамли ривожланиш департаменти раҳбари ўринбосарининг сўзларига изоҳ бераётганимдан хижолатдаман. Агар сессияда ЙҲХББ вакили қатнашганда аслида жараён қандай кечаётгани, нималар ўзгариши, нималар ўз ҳолича қолиши ҳақида ҳеч қандай саволларга ўрин қолдирмайдиган қилиб тақдимот қилган бўларди. Бу жараёнда биргина янглиш маълумот туфайли шунча савол келиб чиқмоқда. Камералар айни пайтда ишлаб турибди, лицензия муддати тугагани йўқ. Шунчаки орадан икки ярим йил ўтгани учун уларнинг дастурий таъминоти янгиланмоқда. Ҳар қандай дастурий таъминот вақти-вақти билан янгилаб турилади», – дейди Шуҳрат Муродов.
ИВВ расмийси янги дастурий таъминот маҳаллий ишлаб чиқарувчининг маҳсулоти экани йўл ҳаракати қоидаларини аниқлаш ва жаримага тортиш тизимига ҳеч қандай ташқи омил таъсир кўрсата олмаслигини айтиб ўтган.
Шунингдек, у Швейцария компанияси билан келишув неча йилга мўлжаллангани, ҳамкорлик қайси сабабларга кўра тўхтатилгани, дастурий таъминотни янгилаш учун нима учун айнан Аbl-soft компанияси танлаб олингани бўйича изоҳ бера олмаслигини, бу хусусда Тошкент шаҳар ҳокимлиги ҳузуридаги Рақамли ривожланиш департаменти жавоб бериши мақсадга мувофиқлигини таъкидлаган.
Эслатиб ўтамиз, 2017 йил март ойида Тошкент шаҳридаги чорраҳаларда кузатув камералари ишга туширилган ва 36 соат ичида 10 мингдан зиёд қоидабузарликларни қайд этганди.
Изоҳ (0)