O‘zbekiston prezidentining 2025-yil 27-martdagi qarori bilan uchta xalqaro shartnomani tasdiqladi.
Bular:
- 2024-yil 23-sentyabr kuni Nyu Yorkda imzolangan O‘zbekiston bilan Portugaliya o‘rtasida iqtisodiy hamkorlik to‘g‘risidagi bitim;
- 2024-yil 24-sentyabr kuni Nyu Yorkda imzolangan O‘zbekiston hukumati bilan Slovakiya hukumati o‘rtasida iqtisodiy hamkorlik to‘g‘risidagi bitim;
- 2024-yil 27-sentyabr kuni Toshkentda imzolangan O‘zbekiston hukumati bilan Hindiston o‘rtasida ikki tomonlama investitsiya bitimi.
Investitsiya, sanoat va savdo vazirligi mazkur xalqaro shartnomalarni amalga oshirish uchun mas’ul etib belgilandi. Vazirlar Mahkamasi hamda tegishli vazirlik va idoralarning rahbarlari mazkur xalqaro shartnomalar kuchga kirganidan keyin belgilangan tartibda ularning qoidalari amalga oshirilishi ustidan nazoratni ta’minlaydi.
O‘zbekiston bilan Portugaliya va Slovakiya o‘rtasida iqtisodiy hamkorlik to‘g‘risidagi bitimlar ikki davlat TIV rahbarlari tomonidan imzolangandi. Baxtiyor Saidov ushbu hujjat savdo va investitsiyaviy hamkorlikni sezilarli darajada mustahkamlashga yordam berishini aytgandi. Vazir O‘zbekiston bilan Slovakiya o‘rtasida iqtisodiy hamkorlik to‘g‘risidagi bitim ishbilarmonlik aloqalari, savdo-sotiqni rivojlantirish va qo‘shma loyihalar ikki tomonlama munosabatlarni rivojlantirishda yanada sezilarli natijalar berishini ta’kidlagandi.
O‘zbekiston hukumati bilan Hindiston o‘rtasida ikki tomonlama investitsiya bitimi esa ikki davlat biznes-forumi doirasida O‘zbekiston bosh vaziri o‘rinbosari Jamshid Xo‘jayev va Hindiston moliya vaziri Nirmala Sitharaman tomonidan imzolangandi. Ushbu hujjat xalqaro amaliyot doirasida o‘zbekistonlik investorlarning Hindistonda va hindistonlik investorlarning O‘zbekistonda munosib himoya qilinishini kafolatlaydi.
Izoh (0)