“Ер қаъридан фойдаланиш маркази” Навоийдаги 31 та кон хитойликларга сотилгани ҳақидаги хабарларни рад этди.
Февраль ойида қимматбаҳо металларни олтин изловчилар усулида қазиб олиш учун 31 та ер қаъри участкалари “E-auksion” савдо платформаси орқали 25,1 млрд сўмга сотилган. Ер қаъри участкаларидан фойдаланиш ҳуқуқи учун рухсатномалар “Ер қаъри тўғрисида”ги қонуннинг 32-моддасига мувофиқ фақат Ўзбекистонда давлат рўйхатидан ўтган юридик шахсларга ёки Ўзбекистон фуқароларига берилади.
Шу талабдан келиб чиқиб электрон савдоларда Ўзбекистонда давлат рўйхатидан ўтган юридик мақомга эга 12 та МЧЖ ғолиб деб топилди. Уларнинг айримлари тўлиқ Ўзбекистон фуқароларига тегишли, айрим МЧЖ таъсисчиларининг ўртача 70 фоизи Ўзбекистон фуқаролари, фақат хорижий давлат, жумладан Хитой фуқароларига тўлиқ тегишли бўлган бирорта ҳам МЧЖ бунда ғолиб ҳам чиққани йўқ, дейилади муносабатда.
Мисол учун, ғолиб деб топилган тадбиркорлик субъектларидан “Хинлонг Мининг Дриллинг” МЧЖ асосий таъсисчиси (70 фоиз) ва “Зҳонгҳуитонг Мининг” МЧЖ асосий таъсисчиси (97,6 фоиз) Ўзбекистон фуқаролари ҳисобланади.
Ер қаъри участкаларидан фойдаланиш ҳуқуқини берувчи рухсатномалар 3 йилга берилади. У ерга эгалик ҳуқуқини назарда тутмайди. Тадбиркорлар фақатгина ер қаъридан фойдали қазилмани олиш, қазиб олиш ишлари жараёнида бузилган ерларни рекултивация қилиш ва уларни келгусида фойдаланиш учун яроқли ҳолатга келтириш мажбуриятини олади.
Рухсатномага эгаларга давлат томонидан бир қатор мажбуриятлар юклатилган. Унда рухсатномага эга бўлган юридик шахслар ишчи-ходимларининг 70 фоизи Ўзбекистон фуқароси бўлиши лозимлиги аниқ белгиланган.
Қимматбаҳо металларни олтин изловчилар усулида қазиб олиш фаолияти тадбиркорлик таваккалчилиги асосида олиб бориладиган фаолият бўлиб, бу участкаларни саноат миқёсида қазиб олиш ишларини амалга ошириш иқтисодий жиҳатдан ўзини оқламайди, дейилади муносабатда.
Шу сабабдан бундай ер участкалари тадбиркорларга шаффофликни таъминлаган ҳолда даромад олиш учун сотилади. Сотилган ер қаъри участкаларида фаолият олиб бораётган маҳаллий ёки хорижий инвесторлар соҳага янги технологиялар, ускуналар киритади, янги иш ўринларини яратади.
Тадбиркорлар томонидан реализация қилинган қимматбаҳо металлар сотувининг 49,5 фоизи ер қаъри участкаси жойлашган маҳаллий бюджетга йўналтирилади ҳамда ҳудудларни ҳар томонлама ривожлантиришга хизмат қилади.
Бугунги глобаллашув даврида, Хитой билан алоқаларни мустаҳкамлаш мамлакатимизнинг иқтисодий тараққиётига эришишида, экспортни ривожланишида, иқтисодиётни модернизация қилишда, транзит йўлларни кенгайтириш ва диверсификация қилишда муҳим драйвер ҳисобланади, дея хулоса қилди “Ер қаъридан фойдаланиш маркази”.
Изоҳ (0)